ლევან გოგიჩაიშვილი მოსამართლეობის კანდიდატის სხდომათა დარბაზიდან გაძევებას ითხოვს

2019-10-23 15:31:28, 2195 ნახვა

პოლიტიკა

პარლამენტის დამოუკიდებელი დეპუტატი ლევან გოგიჩაიშვილი კანონმდებლებს მოუწოდებს, რომ უზენაესი სასამართლოს მოსამართლეობის კანდიდატი პაატა სილაგაძე სხდომათა დარბაზიდან გააძევონ.

ამის მიზეზად გოგიჩაიშვილი, მოსამართლეობის კანდიდატის მხრიდან მის მიმართ უპატივცემულობას ასახელებს.

მანამდე დამოუკიდებელმა დეპუტატმა, მისთვის განკუთვნილი 15 წუთის განმავლობაში, სილაგაძეს ორი კონკრეტული კითხვით მიმართა. კერძოდ, გოგიჩაიშვილი დაინტერესდა, როგორ მოხვდა სილაგაძე იუსტიციის საბჭოს მიერ წარდგენილ ათკაციან სიაში და როგორ ხდებოდა რომ მის სტატისტიკაში 2012 წლის პირველ ოქტომბრამდე გამამართლებელი განაჩენი არ არსებობდა, ხოლო შემდგომში ასეთი 22 განაჩენი დაფიქსირდა.

ამ შეკითხვებს მოსამართლეობის კანდიდატმა არ უპასუხა და გოგიჩაიშვილი არაობიექტურობაში დაადანაშაულა.

"თქვენც ვერ იქნებით ჩემს მიმართ ობიექტური, თქვენი სისხლის სამართლის საქმეც მაქვს განხილული", - მიმართა სილაგაძემ გოგიჩაიშვილს, რაზეც გოგიჩაიშვილმა მიუგო, რომ ეს არ ახსოვდა და ის კითხვებს მოსახლეობის სახელით სვამს.

"როგორ მოხვდით 10-კაციან სიაში? 15 წუთის განმავლობაში ამ შეკითხვას დავსვამ, პასუხის არგაცემაც ხო პასუხია. მაშინ გააძევეთ. ბატონო პაატა, როგორ ხდებოდა რომ თქვენ სტატისტიკაში არ გაგაჩნიათ 2012 წლის პირველ ოქტომბრამდე გამამართლებელი განაჩენი და შემდგომ გაქვთ დაახლოებით 22. მოგწონთ ახლა თქვენი თავი? თუ გინდათ სარკეს შემოგიტანთ. ბატონ დავითს ვეუბნები, მე თქვენ ადგილას იცით რას ვიზამდი? მანდატურს ვეტყოდი, მოკიდეთ ბატონ პაატას ხელი და გააგდეთ ამ ოთახიდანო. მე ვიცავ პარლამენტის ღირსებას და მოგიწოდებთ ბატონი პაატა გააძევოთ, იმიტომ რომ ის პატივს არ სცემს არა ლევან გოგიჩაიშვილს, არამედ პარლამენტის წევრს", - მიმართა დეპუტატმა.

თავის მხრივ სხდომის წამყვანმა, იურიდიულ საკითხთან კომიტეტის თავმჯდომარის მოადგილემ დავით მათიკაშვილმა გოგიჩაიშვილს განუმარტა, რომ მოსამართლეს აქვს უფლება კითხვაზე პასუხი არ გასცეს.