ზურაბ აბაშიძე ირწმუნება, რომ კარასინთან შეხვედრაზე აფხაზეთის გავლით რკინიგზის აღდგენის საკითხი არ განხილულა

2015-07-15 17:52:57, 347 ნახვა

პრემიერ-მინისტრის სპეციალური წარმომადგენელი რუსეთთან ურთიერთობის საკითხებში ზურაბ აბაშიძე ირწმუნება, რომ კარასინთან დღევანდელ შეხვედრაზე აფხაზეთის გავლით რკინიგზის აღდგენის საკითხი არ განუხილავთ.
"ჩვენ ამ საკითხს ამ ფორმატში არ განვიხილავთ, რადგან მათი მიდგომა აბსოლუტურად მიუღებელია. მათი პოზიცია ასეთია- თქვენ თუ გაინტერესებთ, ქართულ მხარეს თუ აინტერესებს, განიხილეთ ეს აფხაზებთან, განიხილეთ ეს სხვა მეზობლებთან. ჩვენი პასუხია, ეს არ გვაინტერესებს",-აღნიშნა ზურაბ აბაშიძემ.
შეგახსენებთ, რუსეთის საგარეო საქმეთა მინისტრის მოადგილე გრიგორი კარასინმა განაცხადა, რომ პრაღის მოლაპარაკების ფორმატში აფხაზეთის გავლით რკინიგზის აღდგენის საკითხიც განიხილეს.
მისივე თქმით, ქართულ მხარესთან შედგა შეთანხმება, რომ ასეთი ტიპის საკითხის განხილვა შესაძლებელია ჰიპოტეტურად, მაგრამ საბოლოო გადაწყვეტილება აფხაზეთისა და საქართველოს ხელმძღვანელობამ პირდაპირი კონტაქტის შედეგად უნდა მიიღოს.
"ჩვენ ყველა საკითხი განვიხილეთ, მათ შორის რკინიგზის თემაც.შევთანხმდით, რომ ასეთი ტიპის საკითხის განხილვა შესაძლებელია ჰიპოტეტურად, მაგრამ საბოლოო გადაწყვეტილება უნდა მიიღოს აფხაზეთისა და საქართველოს ხელმძღვანელობამ პირდაპირი კონტაქტის შედეგად",-განაცხადა გრიგორი კარასინმა.
აბაშიძე-კარასინის შეხვედრა პრაღაში 3 საათის განმავლობაში გაგრძელდა.
კონსულტაციები ამჯერად გაფართოებული შემადგენლობით შედგა. როგორც აღინიშნა, ქართულმა მხარემ სოფელ ორჭოსანსა და ხურვალეთში ე.წ საზღვრის გადმოწევის საკითხი მწვავედ დააყენა.