2015-07-02 13:16:20, 620 ნახვა

---

გიორგი ჩოგოვაძე: საფრთხე, რომ თბილისში მომხდარი წყალდიდობა უარყოფით გავლენას მოახდენდა ტურისტების ნაკადზე, თავიდან ავიცილეთ

2015 წლის ივნისის თვის მონაცემებით, საქართველოს 496 758 საერთაშორისო ვიზიტორი ეწვია, ზრდა წინა წლის ანალოგიურ პერიოდთან შედარებით 9,3%-ია.

ივნისში ტურიზმის სტატისტიკა ტურიზმის ეროვნული ადმინისტრაციის ხელმძღვანელმა გიორგი ჩოგოვაძემ დღეს გამართულ პრესკონფერენციაზე წარადგინა.

მისი თქმით, იმ უცხოელი მოგზაურების, ანუ ტურისტების რიცხვი, რომლებმაც 24 საათი და მეტი დაჰყვეს საქართველოში 197 537-ია, რაც 3.4%-ით აღემატება გასული წლის ანალოგიურ მაჩვენებელს. როგორც ტურიზმის ეროვნული ადმინისტრაციის ხელმძღვანელმა განაცხადა, საფრთხე, რომ თბილისში მომხდარი წყალდიდობა და მსოფლიო მედიაში გავრცელებული დატბორილი ქალაქის კადრები უარყოფით გავლენას მოახდენდა ტურისტების ნაკადზე დიდი იყო, თუმცა მასშტაბურმა საერთაშორისო მარკეტინგულმა კამპანიამ დადებითი შედეგი მოიტანა.

"კამპანია გულისხმობს ცხრა მიზნობრივ ბაზარზე ზაფხულის სეზონისთვის საქართველოს რეკლამილებას, ასევე CNN-სა და EURONEWS-ზე საიმიჯო რგოლის გაშვებას. გარდა ამისა, ვიმუშავეთ სპეციალური გეგმით კრიზისის პერიოდშიც. წყალდიდობის შემდეგ დაიგეგმა პრესტურები, სადაც უცხოელ ჟურნალისტებს საშუალება ჰქონდათ საკუთარი თვალით ენახათ, რომ მთავრობამ უმოკლეს ვადებში შეძლო აღმოეფხვრა სტიქიის შედეგები. ხორციელდებოდა მუდმივ რეჟიმში ინდივიდუალური კომუნიკაცია ტურისტულ კომპანიებთან და საერთაშორისო პარტნიორებთან", - განაცხადა გიორგი ჩოგოვაძემ.

ივნისში საქართველოში ყველაზე მეტი ვიზიტი კვლავ მეზობელი ქვეყნებიდან გამხორციელდა. მათზე მთლიანი ვიზიტების 86% მოდის. "ივნისის თვეში განსაკუთრებით მაღალი ზრდა დაფიქსირდა რუსეთიდან (+47%), სომხეთიდან (+33%) და აზერბაიჯანიდან (+15%). არამეზობელი ქვეყნებიდან გამოირჩეოდნენ ისეთი ქვეყნები, როგორიცაა ყაზახეთი (+40%), ბელორუსი (+56%), ისრაელი (+26%) და გაერთიანებული საამიროები, საიდანაც საერთაშორისო ვიზიტორების რეკორდული ზრდა დაფიქსირდა", - აღნიშნა გიორგი ჩოგოვაძემ. საერთაშორისო ვიზიტორების ჯამურმა რაოდენობამ ამ პერიოდში 2 332 303 შეადგინა. ზრდამ კი 3,5%. 6 თვის მონაცემებით ზრდის კუთხით გამოირჩევა ბელორუსი (+47%), ყაზახეთი (+32%), ლიტვა (+27%), გაერთიანებული სამეფო (+22%) და გერმანია (+18%). აქვე აღსანიშნავია ზრდა ამერიკის შეერთებული შტატებიდან (+12%).

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი