ფინანსთა მინისტრი ივანე მაჭავარიანი აცხადებს, რომ ლარის კურსის ხელოვნურად დასტაბილურება სამომავლოდ გაცილებით უარეს შედეგს მოიტანს.

მინისტრი აღნიშნავს, რომ ლარის კურსი ეკონომიკური რეფორმების შედეგად, ეტაპობრივად უნდა გამყარდეს.

"ლარის კურსის მერყეობა არ არის სასიამოვნო, თუმცა მე მიმაჩნია, რომ მთავრობა და ეროვნული ბანკი არ უნდა ჩაერიოს. ჩვენ უნდა განვახორციელოთ ის რეფორმები, რასაც ვაკეთებთ, - შეგახსენებთ ლარიზაციის რეფორმას, რაც ნიშნავს, რომ რყევების ნეგატიური შედეგების მინიმალიზაცია მოხდეს. საკუთრივ რყევების შემცირებას რაც შეეხება, აუცილებელია ეკონომიკური ზრდა, მიმდინარე ანგარიშის დეფიციტის შემცირება და ექსპორტის ზრდა. შეგახსენებთ, რომ ალბათ საქართველოს ისტორიაში ექსპორტის ერთ-ერთი ყველაზე მაღალი მაჩვენებელი გვაქვს ახლა, 30%-ზე მეტია. ეს მიმართულება სწორია და უნდა განვაგრძოთ. ჩვენი მიზანია საშუალო და გრძელვადიან პერსპექტივაში, ერთის მხრივ - რყევა იყოს მინიმალური და იმ რყევის ასახვა მოსახლეობაზეც იყოს მინიმალური და ეს მოხდეს ლარიზაციით და იმ რეფორმების გატარებით, რომელსაც ვაკეთებთ. პირდაპირი და მყისიერი ჩარევა, ეს პოპულისტური ნაბიჯია, ეს 3 ან 6 თვეს გადაარჩენს, მაგრამ სამომავლოდ ზრდას შეამცირებს, სამუშაო ადგილებს შეამცირებს, ბიზნესს დაარტყამს და ა.შ. არ უნდა წამოვეგოთ ამ კრიტიკას და პოპულიზმს", - განაცხადა მინისტრმა.

ივანე მაჭავარიანი, ასევე, ეკონომიკურ ზრდაზე გულისხმობს და აღნიშნავს, რომ ის მეზობელ ქვეყნებთან შედარებით ორჯერ მეტია.

"ნავთობით, რესურსებით და ინდუსტრიით მდიდარი ქვეყნები, როგორიც თურქეთია, რომელიც პრაქტიკულად ყველაფერს თავის ქვეყანაში აწარმოებს და თვითკმარი ქვეყანაა ინდუსტრიული თვალსაზრისით, აზერბაიჯანი, ყაზახეთი უმდიდრესი ქვეყნებია და მათთან შედარებით 2-ჯერ მეტი ეკონომიკური ზრდა რომ გვაქვს, როგორ გგონიათ, რის ხარჯზეა? რეფორმის ხარჯზეა, თქვენ გგონიათ, რომ აქ ნავთობმა ამოხეთქა თუ ციდან რამე ჩამოვარდა? აქედან გამომდინარე, მე არ მივიღებ შენიშვნას იმაზე, რომ რეფორმები არ ხორციელდება. ეს საკმარისი, ცხადია არ არის, იმიტომ, რომ დაბალი ნიშნულიდან ვიწყებთ, ამიტომ შედარებით ანალიზს ნურავინ წაშლის წარსულთან და მეზობელ ქვეყნებთან", - განაცხადა ივანე მაჭავარიანმა.

ავტორი: ექსპრესნიუსი,

სოციალური ქსელები

ტრამპმა პუტინთან და შემდეგ ზელენსკისთან „გუშინ“ ახალი საუბრის შესახებ განაცხადა

მსახიობი სერგეი ბეზრუკოვი ოკუპირებულ აფხაზეთში იმყოფება

გახარია: სანამ ოცნება იტყუება, ჩვენ ვიცავთ საქართველოს ინტერესებს ეუთოს საპარლამენტო ასამბლეაში

„ფაშისტურ-ნაცისტურ“ დაჯგუფებაში მყოფს მოზარდს წამებისთვის თითქმის 10 წლით თავისუფლების აღკვეთა მიესაჯა.