შსს - მირზა სუბელიანს ქვეყანა არ დაუტოვებია

2018-05-31 23:26:37, 1133 ნახვა

საზოგადოება

საქართველოს შინაგან საქმეთა სამინისტრო არ ადასტურებს ინფორმაციას, რომ პროკურატურის ყოფილმა თანამშრომელმა მირზა სუბელიანმა ქვეყანა დატოვა.

აღნიშნული ინფორმაცია ცოტა ხნის წინ პარლამენტის შენობასთან მიმდინარე აქციაზე ხორავას ქუჩაზე მოკლული დავით სარალიძის მამის უფლებადამცველმა ზვიად კუპტრავამ გაავრცელა.

„ახლა მატყობინებენ, რომ მირზა სუბელიანმა დატოვა ქვეყანა ოჯახთან ერთად“, - აღნიშნა კუპრავამ.

ცნობისთვის, პარლამენტთან მიმდინარე აქციის მონაწილეების მთავარი მოთხოვნა სწორედ მირზა სუბელიანის პასუხისგებაში მიცემაა. ისინი ასევე პრემიერ-მინისტრის და მთავრობის გადადგომას ითხოვენ. გარდა ამისა, მათი მოთხოვნებია: პასუხისგებაში მიეცეს უკვე ყოფილი მთავარი პროკურორი ირაკლი შოთაძე; გადადგეს უზენაესი სასამართლოს თავმჯდომარე ნინო გვენეტაძე, ასევე მოსამართლეები - მიხეილ ჩინჩალაძე და ლევან მურუსიძე.

ადგილზე ათასობით ადამიანია შეკრებილი. ცოტა ხნის წინ აქციას რეგიონებიდანაც შეურთდნენ. ასევე აქციაზე მივიდნენ სპორტული კლუბის „დინამოს“ წარმომადგენლები. გარდა ამისა, აქციაზე საქართველო-საფრანგეთის რაგბის მატჩზე მყოფი მოქალაქეებიც მივიდნენ და ხორავას ქუჩაზე მოკლული მოზარდების ოჯახებს სოლიდარობა გამოუცხადეს.

რუსთაველის გამზირი ამ დროისთვის სრულად გადაკეტილია. ტერიტორიაზე სამართალდამცველები არიან მობილიზებული.

Patreon P მხარი დაუჭირე "ექსპრესნიუსს" →

ავტორი: ,

სოციალური ქსელები