საქართველოს პრეზიდენტის საგარეო ურთიერთობათა მდივანი თენგიზ ფხალაძე ოკუპირებულ აფხაზეთში რუსეთის ფედერაციის პრეზიდენტის ვიზიტს საქართველოს ოკუპაციის პოლიტიკის გაგრძელებად აფასებს და აცხადებს, რომ საქართველოს ოკუპირებული ტერიტორიების არაღიარების პოლიტიკა მოგებული აქვს.

"ეს ვიზიტი არის მცდელობა, რომ რუსეთმა მოახდინოს ისტორიული უსამართლობის ლეგიტიმაცია, თუმცა, ეს სრულიად წაგებული ომია, რადგან ოკუპირებული ტერიტორიების არაღიარების პოლიტიკა ძალიან მტკიცეა და შეიძლება ითქვას, რომ ეს ბრძოლა საქართველოს ნამდვილად მოგებული აქვს. როდესაც საუბარია მსგავსი ტიპის ქმედებებზე, ეს მხოლოდ და მხოლოდ ზიანს აყენებს რუსეთის ფედერაციის იმიჯს. რაც შეეხება ოკუპაციის თემატიკას და ფარული ანექსიის მცდელობებს, დარწმუნებული ვარ, რომ ამ ბრძოლასაც საქართველო მოიგებს და ისტორიული სამართლიანობა აუცილებლად აღდგება", - განაცხადა თენგიზ ფხალაძემ.

გარდა ამისა, თენგიზ ფხალაძე პრეზიდენტის ინიციატივას განმარტავს, რომელიც საქართველოს საკითხებში აშშ-ს სპეციალური წარმომადგენლის დანიშვნას ითვალისწინებს.

თენგიზ ფხალაძის განცხადებით, პრეზიდენტის აღნიშნული ინიციატივა უაღრესად მნიშვნელოვანია და ახლა პრეზიდენტის განცხადების სწრაფი იმპლემენტაციის მექანიზმებზე უნდა ვისაუბროთ.

"სპეციალური წარმომადგენელი, ეს არის აპრობირებული პრაქტიკა. ამერიკის ადმინისტრაცია, როდესაც მათ რაღაც საკითხი აქვთ განსაკუთრებულად აინტერესებთ ნიშნავს თეთრი სახლის სპეციალურ წარმომადგენელს. მაგალითისათვის, არის ისეთი თემები როგორიცაა თუნდაც ბირთვული იარაღის არ გავრცელება, თუნდაც უკრაინის საკითხი, რომელზედაც დაინიშნა სულ ახლახანს სპეციალური წარმომადგენელი, თუ გავიხსენებთ საქართველოს რეალობას, როდესაც ჩვენ გვქონდა ძალიან სერიოზული მოლაპარაკებები გეოპოლიტიკურ პროექტებზე- ბაქო- თბილისი -ჯეიჰანი, ბაქო- თბილისი - ერზრუმი, მაშინ არსებობდა კლინტონის ადმინისტრაციის წარმომადგენელი კასპიის ზღვის საკითხებში, რომელიც ეხმარებოდა საქართველოს ეს პროექტები განხორციელებულიყო", - აღნიშნა თენგიზ ფხალაძემ.

მისი განცხადებით, პრეზიდენტის ინიციატივა არ არის სიახლე, ეს აპრობირებული პრაქტიკაა, რომელიც ძალიან კარგად იციან დიპლომატებმა, საერთაშორისო ურთიერთობების სპეციალისტებმა და ეს არის ის, რაც ეხმარება სახელმწიფოს დასახული მიზნების მიღწევაში.

 თენგიზ ფხალაძის განმარტებით, პრეზიდენტის ინიციატივა, რომელიც გიორგი მარგველაშვილმა მაიკ პენსთან შეხვედრისას გუშინ შერეულ საავიაციო ბაზაზე წამოაყენა, არავითარ შემთხვევაში არ აკნინებს არც ელჩს, არც საგარეო საქმეთა სამინისტროს, არც რომელიმე დღეს მოქმედ დიპლომატს. საუბარია იმ დამატებით მექანიზმის შექმნაზე, რომელიც მათ გაუადვილებს მუშაობას.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ზელენსკი - პუტინი „ნულოვანი პაციენტია“, რომელიც ომის იდეას მთელ მსოფლიოში ავრცელებს

გარდაიცვალა პუტინისტი და უკრაინული შოუ „X-ფაქტორის“ ყოფილი მოსამართლე სერგეი სოსედოვი

ირანის საგარეო საქმეთა მინისტრმა ევროპა გააფრთხილა აშშ-სა და ისრაელის მხარდაჭერის შედეგების შესახებ

ზელენსკიმ გაეროს გენერალური ასამბლეის ტრიბუნიდან რუსეთს ენერგეტიკულ სექტორზე საპასუხო დარტყმებით დაემუქრა