„ქართული ოცნების“ დეპუტატები შს მინისტრს ხვდებიან

2017-06-20 12:32:18, 2027 ნახვა

პოლიტიკა

„ქართული ოცნების“ ცენტრალურ ოფისში მმართველი გუნდის წევრები შინაგან საქმეთა მინისტრ გიორგი მღებრიშვილს ხვდებიან.

მღებრიშვილი პარტიის ოფისში მოადგილეებთან ერთად მივიდა.

როგორც საპარლამენტო უმრავლესობის დეპუტატმა შოთა ხაბარელმა ჟურნალისტებს განუცხადა, შეხვედრაზე სხვა საკითხებთან ერთად აზერბაიჯანელი ჟურნალისტის, აფგან მუხთარლის საქმეზეც ისაუბრებენ.

„ქართული ოცნების“ კიდევ ერთი დეპუტატის, ზაზა გაბუნიას თქმით, პერიოდულად გროვდება თემები, რომელზეც პასუხების მოსმენა აუცილებელია.

„ამაში არაფერია არაბუნებრივი. შს მინისტრი არის ჩვენს მიერ ნომინირებული, წარდგენილი, დამტკიცებული და მისგან, ისევე როგორც სხვად დარგის მინისტრებისგან, ვისმენთ აქტუალურ თემებთან დაკავშირებით პასუხებს. შესაბამისად მორიგი სამუშაო შეხვედრაა დღესაც არაფერი განსაკუთრებული ამაში არ არის“, - განაცხადა გაბუნიამ.

ჟურნალისტის კითხვას - შეეხება თუ არა საუბარი აზერბაიჯანელი ჟურნალისტის აფგან მუხთარლის საქმეს, გაბუნიამ უპასუხა: „როდესაც აქტუალურ თემაზეა საუბარი, ბუნებრივია ეს საკითხიც იგულისხმება. სხვა დეტალებზე ვერაფერს გეტყვით“.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან