თბილისში, ზაარბრიუკენის მოედანზე "მარიოტის" ქსელის მესამე სასტუმრო გაიხსნება.

სასტუმრო "მოქსის" ბრენდი იქნება, რომელიც "მარიოტის" ქვებრენდია. სასტუმრო "მოქსის" მართვასთან დაკავშირებით "ჯი-ემ-თი ჯგუფსა" და "მარიოტს" შორის ხელშეკრულებას ხელი დღეს მოეწერა.

ღონისძიებას ვიცე-პრემიერი, ეკონომიკის მინისტრი გიორგი კვირიკაშვილი, თბილისის ვიცე-მერი დიმიტრი ქუმსიშვილი და საქართველოში აშშ-ის ელჩი რიჩარდ ნორლანდი ესწრებოდნენ.

,,მტკვრის მარცხენა სანაპიროზე, ზაარბრიუკენის, ყოფილი ვორონცოვის მოედანზე ძალიან მნიშვნელოვანი ტურისტული ობიექტი აშენდება, რომელიც საქართველოში კიდევ უფრო მეტ ტურისტს მოიზიდავს. მოხარული ვარ, რომ ,,მარიოტი“, რომელიც საქართველოში თითქმის 15 წელია წარმატებით ოპერირებს, გაფართოებაზე ფიქრობს და ახალ ინვესტიციებს ახორციელებს. ამ სასტუმროს მშენებლობაში მონაწილეობას მიიღებს ასევე ამერიკის სამთავრობო სააგენტო "ოპიკი", რაც კიდევ ერთხელ ადასტურებს საქართველოში ბიზნესის განვითარებისთვის ყველანაირად ხელსაყრელი გარემოს არსებობას", - განაცხადა გიორგი კვირიკაშვილმა.

ეკონომიკის სამინისტროს ინფორმაციით, ,,მოქსის" სასტუმრო 130 ნომრიანი იქნება. "ჯი-ემ-თი ჯგუფის“ ახალი პროექტი, „მარიოტის“ ქსელის უახლესი ეკონომსეგმენტის ბრენდი - ,,მოქსი,, (MOXY) საშუალო და დაბალბიუჯეტიან მომხმარებლებზეა გათვლილი. სასტუმროში ასევე განთავსებული იქნება საოფისე ფართი, რომელსაც შენობის გარკვეული ნაწილი დაეთმობა, სავაჭრო სივრცე და ფუნიკულიორის კომპლექსში არსებული კაფე "პური გულიანისა" და ქართული რესტორნის "ჩელას" ფილიალები.

პროექტის მთლიანი ღირებულება 25 მილიონ აშშ დოლარს შეადგენს და მის განხორციელებაში აშშ-ის სამთავრობო სააგენტო "ოპიკი" მონაწილეობს, რომელიც პროექტს 18 მილიონი დოლარით აფინანსებს. სასტუმრო ,,მოქსის“ მშენებლობა 2017 წლისთვის დასრულდება. თბილისში დაგეგმილი პროექტი აღმოსავლეთ ევროპის მასშტაბით პირველი იქნება. „მოქსის“ პირველი სასტუმრო გასული წლის სექტემბერში მილანში გაიხსნა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

პენიტენციური: პატიმარ გიორგი დავითაძეზე ძალადობის ფაქტს ადგილი არ ჰქონია

ისარგებლეთ საქართველოს ბანკის საკრედიტო Amex-ის შეთავაზებით ოთხ სავაჭრო ცენტრში

Euromoney-მ თიბისი საუკეთესო კორპორატიულ ბანკად მესამედ დაასახელა

ხაშურობისთვის მერიამ ზაზა ნოზაძე გარეპავს- ბიუჯეტიდან კონცერტის ორგანიზატორს 93 000 ლარს გადაუხდიან