ევროკავშირის სპეციალური წარმომადგენლისა და ჟენევის თანათავმჯდომარის ჰერბერტ ზალბერის მიერ ოკუპირებული ცხინვალის ე.წ. პრეზიდენტისთვის, ანატოლი ბიბილოვისთვის ე.წ. არჩევნებში გამარჯვების მილოცვა მიუღებელი და გაუგებარია, - ამის შესახებ საგარეო საქმეთა მინისტრის მოადგილე დავით დონდუამ განაცხადა.

მისი თქმით, აღნიშნული ნაბიჯი საერთაშორისო სამართლის პრინციპებს ეწინააღმდეგება და ხელს არ უწყობს როგორც საქართველოს, ისე საერთაშორისო თანამეგობრობის ძალისხმევას კონფლიქტის მშვიდობიანი მოგვარებისთვის.

„გვქონდა შეხვედრა ევროკავშირის ელჩთან, იანოშ ჰერმანთან, საქართველო-ევროკავშირის ურთიერთობებზე. კიდევ ერთხელ გაჟღერდა ევროკავშირის ურყევი პოზიცია და მხარდაჭერა საქართველოს ტერიტორიული მთლიანობისადმი, სუვერენიტეტისადმი და იმ სამშვიდობო პოლიტიკისადმი, რომელსაც საქართველოს ხელისუფლება ახორციელებს. ევროკავშირის პოზიცია არა ერთხელ გაცხადებული იმ განცხადებებში, რომელსაც ევროკავშირის პერიოდულად აკეთებს საქართველოს ტერიტორიული მთლიანობის მხარდასაჭერად. ასევე იმ დამგმობ განცხადებებში რომელსაც ის აკეთებს, როდესაც ოკუპირებულ ტერიტორიებზე ადგილი აქვს პროვოკაციულ ქმედებებს და ასე იყო ცოტა ხნის წინ როდესაც ცხინვალის რეგიონში ჩატარდა ე.წ. არჩევნები და ე.წ. რეფერენდუმი - ევროკავშირი ერთ-ერთი პირველი იყო, ვინც გამოეხმაურა და დაგმო რუსეთის ფედერაციის ეს პროვოკაციული ქმედება საქართველოს ტერიტორიაზე. ასე რომ, ამ მხრივ ევროკავშირის პოზიცია არ შეცვლილა და როგორც აღვნიშნე, ის მხარს უჭერს საქართველოს ტერიტორიულ მთლიანობას და კონფლიქტის მოგვარებას საერთაშორისო სამართლის პრინციპებით. ის, რაც ჩვენ დღეს მოვისმინეთ ევროკავშირის სპეციალური წარმომადგენლის და ჟენევის თანათავმჯდომარის მხრიდან, რბილად რომ ვთქვათ მიუღებელი და გაუგებარია. ის ეწინააღმდეგება საერთაშორისო სამართლის პრინციპებს და ხელს არ უწყობს როგორც საქართველოს, ისე საერთაშორისო თანამეგობრობის ძალისხმევას კონფლიქტის მშვიდობიანი მოწესრიგებისთვის. ჩვენ კავშირზე ვართ ევროკავშირის ხელმძღვანელობასთან და იმედი გვაქვს, რომ ამას სათანადო რეაქცია მოჰყვება ბრიუსელის მხრიდან", - დასძინა მინისტრის მოადგილემ. 

ცნობისთვის, მომხდარი ფაქტის გამო, საგარეო უწყებამ საქართველოში ევროკავშირის ელჩი დაიბარა. შეხვედრა საგარეო საქმეთა სამინისტროში რამდენიმე წუთის წინ დასრულდა.

შეგახსენებთ, რომ ევროკავშირის სპეციალური წარმომადგენელი სამხრეთ კავკასიასა და საქართველოს კრიზისების საკითხებში ჰერბერტ ზალბერი ე.წ. სამხრეთ ოსეთის დე-ფაქტო პრეზიდენტ ანატოლი ბიბილოვს შეხვდა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

უკრაინა ნიჟნი ნოვგოროდის ოლქში რუსეთის ერთ-ერთ უდიდეს ნავთობგადამამუშავებელ ქარხანას თავს დაესხა

ინდოეთის ოპოზიცია საარჩევნო კომისიის თავმჯდომარის წინააღმდეგ მარშით გამოდის

სოფელ ბერშუეთის მიმდებარედ რუსეთის საოკუპაციო ძალების მიერ უკანონოდ დაკავებული საქართველოს მოქალაქე თავისუფალია

პაპუაშვილი – ევროკავშირი და მისი საელჩო ძალადობის მხარდაჭერის ტესტში საკმარისზე მეტჯერ ჩაიჭრნენ