გიორგი კანდელაკის მიერ ნასროლი საფერფლე ოთარ კახიძეს მოხვდა - დეპუტატმა პარლამენტი დატოვა

2017-04-19 16:22:44, 2321 ნახვა

პოლიტიკა

„ევროპული საქართველოს“ დეპუტატი ოთარ კახიძე პარლამენტის შენობიდან თავის არეში მიყენებული დაზიანებით გაიყვანეს.

არსებული ინფორმაციით, დეპუტატების ოთახში "ევროპული საქართველოს" წევრ გიორგი კანდელაკს და მმართველი გუნდის დეპუტატ ვანო ზარდიაშვილს შორის დაპირისპირება მოხდა, რა დროსაც ოთარ კახიძემ დაზიანება მიიღო.

ოთარ კახიძე პარლამენტის შენობიდან, მისმა თანაგუნდელმა გიორგი ტუღუშმა გააცილა.

გავრცელებული ინფორმაციით, გიორგი კანდელაკმა უმრავლესობის წევრ ვანო ზარდიაშვილს დაპირისპირების დროს საფერფლე ესროლა, რომელიც შემთხვევით მის თანაგუნდელს მოხვდა.

ცნობისთვის, პარლამენტის პლენარული სხდომა დახურულ რეჟიმში მიმდინარეობს. მისი პირდაპირი ტრანსლირება კიდევ ერთი დაპირისპირების დროს შეწყდა. კერძოდ, კი ფიზიკური დაპირისპირება ფრაქცია „საქართველოს პატრიოტების“ დეპუტატ ემზარ კვიციანსა და "ევროპული საქართველოს" წევრ გიგა ბოკერიას შორის მოხდა. ამის შემდეგ, პარლამენტის თავმჯდომარემ ტექნიკური შესვენება გამოაცხადა.

ამ დროისთვის მედიის წარმომადგენლებს ოთახში შესვლის შესაძლებლობა არ აქვთ, ვინაიდან დერეფნის კარი ჩაკეტილია.

ინფორმაციას აღნიშნულის შესახებ "საზოგადოებრივი მაუწყებელი" ავრცელებს.

ფოტო (c) imedinews

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან