დავით ზალკალიანმა ნიუ-იორკში სამუშაო შეხვედრები გამართა

2017-04-13 10:38:40, 1788 ნახვა

პოლიტიკა

2017 წლის 7-12 აპრილს საგარეო საქმეთა მინისტრის პირველი მოადგილე დავით ზალკალიანი ნიუ-იორკში სამუშაო ვიზიტით იმყოფებოდა.

ვიზიტის ფარგლებში საგარეო საქმეთა მინისტრის პირველმა მოადგილემ გამართა 50-ზე მეტი შეხვედრა სხვადასხვა ქვეყნის წარმომადგენელთან, რომლის დროსაც განხილულ იქნა ორმხრივი და მრავალმხრივ ფორმატებში თანამშრომლობის აქტუალური თემები.

საგარეო საქმეთა მინისტრის პირველმა მოადგილემ ასევე გამართა შეხვედრები გაერო-ს გენერალური ასამბლეის პრეზიდენტთან პიტერ ტომსონთან და პოლიტიკურ საკითხებში გაერო-ს გენერალური მდივნის მოადგილესთან ჯეფრი ფელტმანთან. შეხვედრებზე მხარეებმა განიხილეს საქართველოსა და გაერო-ს შორის თანამშრომლობის გაღრმავების პერსპექტივები. განსაკუთრებული ყურადღება დაეთმო გაერო-ს სამუშაო პროგრამაში საქართველოსთვის პრიორიტეტულ საკითხებს.

ვიზიტის ფარგლებში გამართულ შეხვედრებზე დავით ზალკალიანმა დელეგაციებს მიაწოდა ამომწურავი ინფორმაცია საქართველოს ოკუპირებულ ტერიტორიებზე უსაფრთხოებისა და ადამიანის უფლებების დაცვის კუთხით არსებული მძიმე მდგომარეობის თაობაზე. ქართული მხარის მიერ ყურადღება გამახვილდა ოკუპირებულ რეგიონებში ბოლო პერიოდში გამართულ ეწ. არჩევნებსა და ე.წ. რეფერენდუმზე, ასევე, აფხაზეთის რეგიონში ე.წ. გადასასვლელი პუნქტების დახურვასა და ოკუპირებული აფხაზეთისა და ცხინვალის რეგიონების უკანონო სამხედრო დაჯგუფებების რუსეთის შეიარაღებულ ძალებში შესვლის თაობაზე ე.წ. შეთანხმებების დადებაზე.