მიხეილ ჯანელიძე: საქართველოსთვის ვიზალიბერალიზაციის მინიჭება იყო გზავნილი მსოფლიოსთვის

2017-03-31 14:42:18, 1786 ნახვა

პოლიტიკა

ევროკავშირის მიერ საქართველოსთვის ვიზალიბერალიზაციის მინიჭება ეს არის ჩვენი ქვეყნის, ჩვენი სახელმწიფო ინსტიტიციების და თითეული თქვენგანის აღიარება, რომ თქვენ, საქართველოს მოქალაქეს, რომელსაც გაქვთ საქართველოს პასპორტი, გაქვთ თავისუფლება გადაადგილდებოდეთ ევროკავშირის მასშტაბით, შედიოდეთ თავისუფლად, მაშინ როდესაც ეს არის უდიდესი გამოწვევა დღეს ევროკავშირისთვის"- ამის შესახებ საქართველოს საგარეო საქმეთა მინისტრმა მიხეილ ჯანელიძემ ქუთაისის სახელმწიფო უნივერსიტეტში სტუდენტებთან და პროფესორ მასწავლებლებთან შეხვედრაზე განაცხადა.

მინისტრის განცახდებით, საქართველოსთვის უვიზო მიმოსვლის მინიჭების შესახებ გადაწყვეტილება ევროკავშირმა გამოწვევებით სავსე პერიოდში მიიღო, როდესაც დიდია მიგრაციული ნაკადი. მიხეილ ჯანელიძის შეფასებით, ამ ყველაფრის ფონზე საქართველოსთან უვიზო რეჟიმის გაფორმება იყო მნიშვნელოვანი განაცხადი ევროკავშირის მხრიდან.

"საქართველომ ყველა რეფორმა გაატარა და მიუხედავად ევროკავშირში არსებული მიგრაციული კრიზისისა, ჩვენ ეს დავიმსახურეთ და საქართველოსთან დაკავშირებით გადაწყვეტილება იქნა მიღებული. სწორედ ამიტომ, დღეს მთელი მსოფლიოს მასშტაბით გაჟღერდა, რომ მიუხედავად მიგრაციული კრიზისისა, ევროკავშირი ღიაა საქართველოსთვის. ეს იყო მესიჯი მთელი მსოფლიოსთვის. ეს იყო ძალიან პოზიტიური , 28 მარტი იყო საქართველოს ზეიმის დღე ბრიუსელში, სადაც ყველა აღნიშნავდა, თუ რა პროგრესს მიაღწია საქართველომ , რამდენად სანდო და მნიშვნელოვანი პარტნიორი გახდა ის ევროკავშირისთვის"- განაცხადა მინისტრმა.

ვიზა ლიბერალიზაციის საინფორმაციო კამპანიის ფარგლებში მიხეილ ჯანელიძე ქუთაისს ეწვია. საქართველო-ევროკავშირის საინფორმაციო კამპანიის ფარგლებში, საგარეო საქმეთა მინისტრი იმერეთის რეგიონში, საქართველოს ევროპული ინტეგრაციისა და ევროკავშირის/შენგენის სივრცესთან უვიზო რეჟიმის შემოღების საკითხებზე ადგილობრივ მოსახლეობასთან შეხვედრას მართავს.