ვიქტორ დოლიძე სამუშაო ვიზიტით ლიტვაში იმყოფება

2017-02-08 22:30:14, 1632 ნახვა

პოლიტიკა

როგორც უსაფრთხოების საკითხებში საერთაშორისო თანამეგობრობს სტაბილური და ერთგული პარტნიორი, საქართველო იმსახურებს მტკიცე მხარდაჭერას ევროკავშირსა და ნატო-ში ინტეგრაციის გზაზე, - ამის შესახებ ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრს ვიქტორ დოლიძეს ლიტვის რესპუბლიკაში, ქ.ვილნიუსში 7-8 თებერვალს გამართული სამუშაო ვიზიტის მსვლელობისას განუცხადეს, სადაც სახელმწიფო მინისტრმა ორმხრივი შეხვედრები გამართა საგარეო საქმეთა მინისტრ ლინას ლინკევიჩუსთან, ეროვნული თავდაცვის მინისტრის მოადგილე ვიტაუტას უმბრასასთან, ლიტვის სეიმის ვიცე-სპიკერ გედიმინას კირკილასთან, ასევე, სეიმის საგარეო საქმეთა კომიტეტის თავმჯდომარე უოზას ბერნატონისთან და სეიმის სხვა წევრებთან.

მხარეებმა საქართველოს ევროკავშირსა და ნატო-ში ინტეგრაცის პროცესსა და პერსპექტივებზე ისაუბრეს. ლიტვის მხარის წარმომადგენლებმა მიულოცეს ვიქტორ დოლიძეს ევროკავშირთან სავიზო რეჟიმის ლიბერალიზაციის თაობაზე ევროპარლამენტის მხარდაჭერა და აღნიშნეს, რომ ლიტვა მომავალშიც მტკიცედ განაგრძობს საქართველოს ევროპული მისწრაფებების მხარდაჭერასა და ხელშეწყობას როგორც ევროკავშირთან და ნატო-სთან თანამშრომლობის, ასევე, ორმხრივ ფორმატში.

შეხვედრებზე ყურადღება გამახვილდა აღმოსავლეთ პარტნიორობის მონაწილე ქვეყნების წინაშე არსებულ გამოწვევებზე და ხაზი გაესვა ევროკავშირის გადაწყვეტილებებში ამ პროგრამის წარმატებით მონაწილე ქვეყნების მხარდაჭერის მნიშვნელობას. ლიტვის აღმასრულებელი და საკანონმდებლო ხელისუფლების წარმომადგენლებმა, აგრთვე, აღნიშნეს, რომ ლიტვა ძალისხმევას არ დაიშურებს პარტიორებთან მუშაობისას აღმოსავლეთ პარტიონობისა და ნატო-ს მომავალ სამიტებზე საქართველოს საკითხის აქტიურად განხილვის მიმართულებით.

მხარეებმა მომძლავრებული ანტიდასავლური პროპაგანდის ფონზე სტრატეგიული კომუნიკაციის გაძლიერების აუცილებლობაზეც იმსჯელეს, აგრეთვე, საქართველოს ოკუპირებულ ტერიტორიებსა და საოკუპაციო ხაზთან არსებულ ვითარებაზეც ისაუბრეს. ლიტვის ხელისუფლებს წარმომადგენლებმა კიდევ ერთხელ დაადასტურეს საერთაშორისოდ აღიარებულ ფარგლებში საქართველოს ტერიტორიული მთლიანობისა და სუვერენიტეტის მხარდაჭერა.

შეხვედრებზე აღინიშნა საქართველოს განსაკუთრებული წვლილი საერთაშორისო სამშვიდობო ოპერაციებში. ლიტვის მხარემ მადლობა გადაუხადა ქართულ მხარეს განხორციელებული მნიშვნელოვანი კონტრიბუციისთვის.

სამუშაო ვიზიტის ფარგლებში ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა ვიქტორ დოლიძემ, ასევე, მონაწილეობა მიიღო ლიტვის რესპუბლიკაში საქართველოს საელჩოსა და ვილნიუსის აღმოსავლეთ ევროპის კვლევითი ცენტრის (EESC) მიერ ორგანიზებული მრგვალი მაგიდის მუშაობაში - „ევროკავშირი-საქართველოს ასოცირების შეთანხმების იმპლემენტაცია: გამოწვევები და გადაწყვეტილებები". სახელმწიფო მინისტრმა საქართველოს ევროკავშირსა და ნატო-ში ინტეგრაციის პროცესზე, საგარეო გამოწვევებსა და მიღწეულ პროგრესზე ისაუბრა და პარტნიორებს აღნიშნული პროცესის პერსპექტივებზე აქტიური მსჯელობისკენ მოუწოდა. ღონისძიებას ლიტვის საგარეო საქმეთა და თავდაცვის სამინისტროების, სხვადასხვა ადგილობრივი ორგანიზაციებისა და პოლიტიკური პარტიების წარმომადგენლები ესწრებოდნენ.

(NS)