საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა  მინისტრი  სოზარ სუბარი  და  საქართველოს მუნიციპალური განვითარების ფონდის  აღმასრულებელი  დირექტორი  ჯუანშერ ბურჭულაძე სამეგრელოს რეგიონში იმ დევნილ ოჯახებს ესტუმრნენ, რომლებსაც  „სოფლად სახლის“  პროექტის ფარგლებში სახლები და მიწის ნაკვეთები გადაეცათ.

ლტოლვილთა და განსახლების სამინისტროს ინფორმაციით, მუნიციპალური განვითარების ფონდმა, დევნილთა და განსახლების სამინისტროსთან თანამშრომლობითა და გერმანიის  რეკონსტრუქციის საკრედიტო ბანკის დაფინანსებით  ,,სოფლად სახლის“ პროექტის ფარგლებში, დასავლეთ საქართველოში 61 დევნილი ოჯახისთვის სახლი  შეიძინა.

უწყების ცნობით, სოზარ სუბარი და ჯუანშერ ბურჭულაძე სენაკის რაიონის სოფელ თეკლათში აფხაზეთიდან დევნილ რევაზ ესართიას ოჯახს ესტუმრნენ.   გერმანიის რეკონსტრუქციის საკრედიტო ბანკის (KFW) დაფინანსებით,  რევაზ ესართიას 2-სართულიანი სახლი, 20 სკა ფუტკარი  და 3,5 ჰექტარი სასოფლო-სამეურნეო მიწის ნაკვეთი შეუსყიდეს, სადაც ოჯახს მარცვლეული კულტურა მოჰყავს.

როგორც თავად რევაზ ესართია ამბობს, მისი ოჯახი არა მარტო საკუთრების მფლობელი გახდა, არამედ  შემოსავლის წყაროც გაიჩინა და სახელმწიფოს დახმარებაზე აღარ არის დამოკიდებული.

დევნილთა და განსახლების სამინისტროსთან გაფორმებული მემორანდუმის თანახმად, საქართველოს მუნიციპალური განვითარების ფონდი, „სოფლად სახლის“ პროექტის  ფარგლებში, დასავლეთ საქართველოში დევნილებისათვის კიდევ 100 000 ევროს ღირებულების  სახლებს შეიძენს.  აღნიშნული თანხით კიდევ  10 ოჯახი დაკმაყოფილდება, რომლებსაც სამინისტრო გრძელვადიანი განსახლების კრიტერიუმების შესაბამისად შეარჩევს.

დევნილთა გრძელვადიანი განსახლების მიზნით, მუნიციპალური განვითარების ფონდმა, დევნილთა და განსახლების სამინისტროსთან თანამშრომლობითა და გერმანიის  რეკონსტრუქციის საკრედიტო ბანკის (KFW) დაფინანსებით,  არაერთი პროექტი განახორციელა.  სარეაბილიტაციო და სამშენებლო სამუშაოები ჩატარდა წყალტუბოში (23 ბინა), ქუთაისში (65 ბინა), ფოთსა (112 ბინა) და ზუგდიდში (320 ბინა).

საერთო ჯამში, გრძელვადიანი განსახლების პროექტის ფარგლებში, აღნიშნული თანამშრომლობის შედეგად,  592 დევნილი ოჯახის ბინით უზრუნველყოფა იქნება შესაძლებელი.

(NS) 

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

გელენჯიკში დაღუპულთა რიცხვი ექვსამდე გაიზარდა, რომელთაგან სამი ბავშვია. დაახლოებით 40 ადამიანი დაშავდა

Deutsche Welle-ს ევროკავშირის დაფინანსებით ქართულენოვანი საინფორმაციო სამსახური გახსნა

საიამ სტრასბურგში არჩევნების საქმეზე ოცნების საპასუხო წერილობითი პოზიცია წარადგინა

WSJ: რუსეთის ხელისუფლება სექტემბრის არჩევნების შემდეგ მობილიზაციის საკითხს განიხილავს