საქართველოს სასჯელაღსრულებისა და პრობაციის მინისტრი კახა კახიშვილი, სამინისტროს დელეგაციასთან ერთად, სომხეთში ვიზიტის ფარგლებში, იუსტიციის მინისტრს არპინე ოვანისიანს შეხვდა.  

შეხვედრაზე მხარეებმა უწყებებს შორის თანამშრომლობის გაღრმავებაზე ისაუბრეს. კახა კახიშვილმა სომხეთის იუსტიციის მინისტრს საქართველოს სასჯელაღსრულებისა და პრობაციის სამინისტროს სისტემაში გატარებული რეფორმები გააცნო, მათ შორის ყურადღება გამახვილდა მსჯავრდებულთა რისკების მიხედვით გადანაწილებაზე, პენიტენციური დაწესებულებების მართვის თანამდროვე მოდელების დანერგვასა და არასრულწლოვანთა მართლმსაჯულების საკითხებზე. საუბარი შეეხო მსჯავრდებულთა რესოციალიზაცია-რეაბილიტაციის მიმართულებით არსებულ პროგრამებს, ასევე, პატიმრობის ალტერნატიული სასჯელების განვითარების მნიშვნელობას. 

მხარეები სამომავლოდ თანამშრომლობის გაღრმავებისა და გამოცდილების გაზიარების მიზნით, თანამშრომლების ურთიერთგაცვლისა და ერთობლივი სასწავლო პროგრამების განხორციელებაზე შეთანხმდნენ. 

ვიზიტის ფარგლებში, სასჯელაღსრულების და პრობაციის სამინისტროს დელეგაცია, კახა კახიშვილის ხელმძღვანელობით, სომხეთის იუსტიციის სამინისტროს პენიტენციური დეპარტამენტის ხელმძღვანელს არტურ ოსიკიანს შეხვდა, რომელიც საქართველოს სასჯელაღსრულებისა და პრობაციის სფეროს რეფორმებს გაეცნო. სომხეთში  პენიტენციური დაწესებულებების მართვაზე პასუხისმგებელი ორგანო პენიტენციური დეპარტამენტია, რომელიც იუსტიციის სამინისტროს დაქვემდებარებაშია. პრობაციის სფერო კი, ალტერნატიული სასჯელების აღსრულების სამმართველოს სახით, პენიტენციური დეპარტამენტის შემადგენლობაში შედის.  როგორც შეხვედრაზე აღინიშნა, ახლო მომავალში დაგეგმილია პრობაციის სისტემის ცალკე დეპარტამენტად შექმნა. საქართველოს სასჯელაღსრულებისა და პრობაციის მინისტრმა სომხეთის მხარეს ამ პროცესში ქართული გამოცდილების გაზიარება შესთავაზა და მხარდაჭერა აღუთქვა. გარდა ამისა, მათი დაინტერსება საქართველოს სასჯელაღსრულებისა და პრობაციის სამინისტროს სამედიცინო დეპარტამენტის სტრუქტურამ და მუშაობამ გამოიწვია, ვინაიდან სომხეთში პენიტენციური ჯანდაცვის პერსონალი უშუალოდ პენიტენციურ დეპარტამენტს ექვემდებარება. სომხეთის მხარე ასევე,  საქართველოს სასჯელაღსრულებისა და პრობაციის სასწავლო ცენტრის მუშაობის სპეციფიკით და ამ კუთხით გამოცდილების გაზიარებით დაინტერესდა. 

საქართველოს პენიტენციურ და პრობაციის სისტემაში არსებული ვითარების ადგილზე შესწავლისა და გამოცდილების გაზიარებისთვის, კახა კახიშვილმა სომხეთის იუსტიციის მინისტრი და პენიტენციური სამსახურის ხელმძღვანელი თბილისში მოიწვია. 

კახა კახიშვილი სომხეთში ოფიციალური ვიზიტის ფარგლებში, დღესვე, ქვეყნის პრემიერ-მინისტრს ჰოვიკ აბრაჰამიანს შეხვდება. საქართველოს სასჯელაღსრულებისა და პრობაციის სამინისტროს დელეგაციის შემადგენლობაშია პენიტენციური დეპარტამენტის ხელმძღვანელი ზვიად მიხანაშვილი. 

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

საქართველოს ბანკის მხარდაჭერით თბილისში პირველი ჰიპ-ჰოპ ფესტივალი გაიმართება

არასრულწლოვანი შვილიშვილი აიძულა, ცოლად გაჰყოლოდა თანასოფლელს - მარნეულში ქალი დააკავეს

ავარია რომელსაც 5 წლის სანი ცეცხლაძის სიცოცხლე ემსხვერპლა - როგორ ავიცილოთ გახშირებული ტრაგედიები

სამხრეთ კორეამ უკრაინა დაადანაშაულა ორი ჩრდილოეთ კორეელი სამხედრო ტყვეების საიდუმლოდ გადაცემის გამჟღავნებაში და ბოდიშის მოხდა მოითხოვა