გილაური: ბიზნესი დღეს არის აბსოლუტურად თავისუფალი და შეუძლია იპოვოს სამართალი

2016-06-20 19:43:30, 993 ნახვა

ეკონომიკა

"საქართველოს ბანკის" გენერალური დირექტორი ირაკლი გილაური დღევანდელ ეკონომიკურ ფორუმს ძალიან მნიშვნელოვანს უწოდებს. გილაურის თქმით, მთავრობასა და ბიზნესს შორის არსებული დიალოგი უნდა გაგრძელდეს.

ამასთან, გილაური იმ მიღწევებზე საუბრობს, რაც ახალი ხელისუფლების პირობებში გაკეთდა. მაგალითისთვის გილაური ბიზნესის თავისუფლებას და ზოგადად გაუმჯობესებულ ბიზნესგარემოს ასახელებს:

"ძალიან კარგი შეხვედრა იყო, იყო აზრების გაცვლა, საუბარი რეფორმებზე, რაც გაკეთდა და რაც არის გასაკეთებელი. კარგია, რომ ბიზნესი უსმენს მავრობას და მთავრობა უსმენს ბიზნესს და მნიშვნელოვანია, რომ ეს დიალოგი გაგრძელდეს. ჩვენი აზრით, ის მიღწევები, რაც გაკეთდა იქიდან გამომდინარე, რომ ბიზნესი არის აბსოლუტურად თავისუფალი, ბიზნესს შეუძლია იპოვოს სამართალი, ეს ძალიან მნიშვნელოვანია და უწყობს ხელს ინვესტიციების შეოდინებას. ჩვენი წლევანდელი პროგნოზი არის 4 %-ზე მეტი ზრდა, მომავალ წელს 8%-იან ზრადას ველოდებით, ვიზიტი, რაც ჰქონდა პრემიერს ლონდონსა და ნიუ-იორკში შეფასებულია დადებითად, რადგან ინვესტორებს კიდევ უფრო მეტის ჩადება უნდათ საქართველოში",-განაცხადა ირაკლი გილაურმა.

კონფერენცია-"საქართველოს ეკონომიკა და ბიზნესგარემო - მიღწევები და გამოწვევები“ ორგანიზაცია "მოქალაქე"-ს, "საქართველოს ბიზნეს ასოციაციისა" და პარტნიორი ორგანიზაციების ორგანიზატორობით ჩატარდა.