„ვალეში“ სომხური წარმოშობის საქართველოს მოქალაქეებსა და თურქ მძღოლებს შორის დაპირისპირება მოხდა

2016-04-19 17:41:57, 746 ნახვა

საზოგადოება

საქართველო-თურქეთის საზღვარზე თურქეთის მოქალაქეებსა და სომხური წარმოშობის საქართველოს მოქალაქეებს შორის სიტყვიერი დაპირისპირება მოხდა.

დაპირისპირება მას შემდეგ დაიწყო, რაც სომხური წარმოშობის პირებმა თურქულ ტრაილერებს გზა გადაუკეტეს და საზღვარზე გადასვლის საშუალებას არ აძლევდნენ. ინციდენტის შემდეგ შექმნილი საცობის შემდეგ დაახლოებით 4 კილომეტრის მანძილზე გადაადგილების პრობლემა შეიქმნა.

ვითარება მას შემდეგ განიმუხტა, რაც ადგილზე საპატრულო პოლიციის ეკიპაჟები მივიდნენ. როგორც „ექსპრესნიუსს“ შინაგან საქმეთა სამინისტროს საზოგადოებასთან ურთიერთობის სამსახურში განუცხადეს, სამართალდამცველებმა გამოკითხვის ოქმები შეადგინეს, რის შემდეგაც დაპირისპირებულმა მხარეებმა ტერიტორია დატოვეს.

ამასთან, თურქული გაზეთის „საბახის“ ინფორმაციით, სომეხმა მოქალაქეებმა ტრაილერებს ქვები დაუშინეს, თუმცა აღნიშნულ ფაქტს შსს-ში არ ადასტურებენ. „საბახი“ დაპირისპირების მიზეზად ეროვნულ შუღლს ასახელებს.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან