აბუ-დაბიში დაიწყო აშშ-უკრაინა-რუსეთის მოლაპარაკებების მორიგი რაუნდი

2026-11-10 13:24:06, 353 ნახვა

მსოფლიო

10 ნოემბერს არაბთა გაერთიანებული საამიროების დედაქალაქ აბუ-დაბიში განახლდა აშშ-უკრაინა-რუსეთის მოლაპარაკებები ომის დასრულების მიზნით.

სამმხრივი მოლაპარაკებების ეს რაუნდი, რომელიც 11 ნოემბერსაც უნდა გაგრძელდეს, პირველია 2026 წლის თებერვლის შემდეგ.

უკრაინის დელეგაციას ხელმძღვანელობს საგარეო დაზვერვის სამსახურის უფროსი რუსტემ უმეროვი, ხოლო რუსეთისას - პრეზიდენტ პუტინის თანაშემწე ვლადიმირ მედინსკი. აშშ-ს წარმოადგენენ პრეზიდენტ ტრამპის სპეციალური წარმომადგენლები სტივენ უიტკოფი და ჯარედ კუშნერი.

„გადავედით მოლაპარაკებების სამმხრივ ფორმატზე უკრაინა-აშშ-რუსეთი. დღის წესრიგშია საბრძოლო მოქმედებების შეწყვეტისა და მშვიდობის მოახლოების ძირითადი საკითხები", - დაწერა სოციალურ ქსელებში უკრაინის დელეგაციის ხელმძღვანელმა რუსტემ უმეროვმა.

მანამდე უკრაინის დელეგაცია და აშშ-ის წარმომადგენლები აბუ-დაბიში შეხვდნენ დიდი ბრიტანეთის, საფრანგეთის, გერმანიის, იტალიის, ნატოს და ევროკომისიის წარმომადგენლებს.

აშშ-უკრაინა-რუსეთის მოლაპარაკებების განახლების წინ პრეზიდენტ პუტინის პრესმდივანმა დმიტრი პესკოვმა ჟურნალისტებს განუცხადა, რომ მოლაპარაკება მიეძღვნება უსაფრთხოების გარანტიებს.

აშშ-ის პრეზიდენტმა დონალდ ტრამპმა 9 ნოემბერს თეთრ სახლში ჟურნალისტებს უთხრა, რომ რუსეთ-უკრაინის ომის დასასრულებლად არსებობს მეტი მზადყოფნა და „ძლიერი დახრა“.

აბუ-დაბიში მოლაპარაკების განახლების წინ დასავლეთის სხვადასხვა მედიასაშუალებამ აშშ-ის ადმინისტრაციის წარმომადგენლებზე დაყრდნობით დაწერა, რომ გარკვეული ოპტიმიზმი არსებობს, რადგან მხარეები მეტ მოქნილობას იჩენენ და რუსეთისგან არის ომის დასრულების სურვილის ნიშნებიც.