რუსეთის ხელისუფლებამ გადაწყვიტა, საზოგადოებისგან დამალოს ინფორმაცია ბენზინის ფასების შესახებ, რომლებიც სწრაფად იზრდება საწვავის კრიზისის ფონზე, რომელმაც რუსეთის თითქმის ყველა რეგიონი მოიცვა.

როიტერის ცნობით, გასულ კვირას რუსეთის მთავრობამ გამოსცა დადგენილება, რომლითაც Rosstat-ის ყოველკვირეული ანგარიში ბენზინისა და დიზელის საწვავის ფასების შესახებ ფედერალური სტატისტიკური გეგმიდან ამოიღეს.

Rosstat ამ მონაცემებს ყოველ ოთხშაბათს აქვეყნებდა. მისმა უახლესმა ანგარიშმა აჩვენა, რომ ბენზინის საშუალო საცალო ფასები 16-დან 22 ივნისის ჩათვლით კვირაში 3%-ით გაიზარდა - რაც რეკორდია ბოლო 20 წლის განმავლობაში ნებისმიერი კვირის პერიოდისთვის. ივნისის სამ კვირაში ბენზინის ფასები 5%-ით გაიზარდა - უფრო მეტი, ვიდრე 2018 წლის მაისის შემდეგ ნებისმიერ სრულ თვეში.

წლიური მაჩვენებლით, Raiffeisenbank-ის გათვლებით, საწვავის ინფლაციამ 18%-ს მიაღწია. ეს რეკორდია 2010 წლის მაისიდან, როდესაც ბენზინის ფასები წლიურად 23%-ით გაიზარდა.

ბენზინის ფასები მკვეთრად იზრდება ნავთობგადამამუშავებელ ქარხნებზე დრონებით თავდასხმების გამო, რომლებმაც ბოლო ორი თვის განმავლობაში ათი უდიდესი ნავთობგადამამუშავებელი ქარხნიდან ცხრა დააზარალა. სიმძლავრის მიხედვით ათეულში შემავალი ერთადერთი ქარხანა, რომელიც რეიდებს გადაურჩა, ომსკის ნავთობგადამამუშავებელი ქარხანა იყო, რომელიც ყოველწლიურად 5 მილიონ ტონა ბენზინს აწარმოებს.

„როიტერის“ შეფასებით, ივნისში ბენზინის წარმოება წლიურად 25%-ით შემცირდა და დღეში დაახლოებით 85 000 ტონას მიაღწია, ხოლო ზაფხულის თვეებში მოხმარება 110 000 ტონას აღწევს. რუსეთის 40-ზე მეტმა რეგიონმა უკვე დააწესა ოფიციალური შეზღუდვები ბენზინის გაყიდვებზე. ყველაზე დიდი რაოდენობა - 10 რეგიონი - ცენტრალურ ფედერალურ ოლქშია, სადაც თითქმის ყველა მოქმედი ნავთობგადამამუშავებელი ქარხანა დაზარალდა.

ბენზინის წარმოების გაზრდის მიზნით, რუსეთის ხელისუფლებამ უკვე მისცა ნავთობგადამამუშავებელ ქარხნებს ბენზინის ხარისხის ევრო-3-მდე დაწევის უფლება და ასევე განიხილავენ ევრო-2 სტანდარტზე დაბრუნებას, რომელიც 2013 წელს აიკრძალა. კრემლის პრესსპიკერმა დიმიტრი პესკოვმა სამშაბათს დაადასტურა, რომ მიმდინარეობს მოლაპარაკებები ბენზინის შესაძლო უცხოური შესყიდვების შესახებ, მაგრამ კონკრეტული ქვეყნების დასახელებისგან თავი შეიკავა.

ავტორი: ექსპრესნიუსი,

სოციალური ქსელები

ფონ დერ ლაიენი: უკრაინის ომი "ახალ, ბნელ ფაზაში" შევიდა

„ჩვენ შეგვიძლია დავივიწყოთ სამართლიანი სამყარო“: ბრიტანელი კონსერვატორების ლიდერმა გააკრიტიკა ტრამპის პოლიტიკა რუსეთის მიმართ

„უკრაინის შეიარაღებულმა ძალებმა შესაბამისი ბრძანებები მიიღეს“, - ზელენსკიმ დაადასტურა რუსეთთან ენერგეტიკული ცეცხლის შეწყვეტის შესახებ შეთანხმება

ბერნჰემი: რუსეთი ჩაერია დიდი ბრიტანეთის ევროკავშირიდან გასვლის შესახებ რეფერენდუმში