ამ კვირაში აშშ-მ კარიბის ზღვის აუზში დიდი რაოდენობით სპეციალური ოპერაციების თვითმფრინავი და რამდენიმე სატვირთო თვითმფრინავი განალაგა, რომლებიც ჯარითა და აღჭურვილობით იყო დატვირთული.

ამის შესახებ ინფორმაციას The Wall Street Journal ავრცელებს აშშ-ის ოფიციალურ პირებზე დაყრდნობით და ღია წყაროებიდან ფრენის ინფორმაცია მოჰყავს.

WSJ-ის ცნობით, ორშაბათს, ნიუ-მექსიკოში, კენონის საჰაერო ძალების ბაზიდან კარიბის ზღვის აუზში განლაგდა მინიმუმ 10 ამერიკული CV-22 Osprey ტიპის დახრილი როტორიანი თვითმფრინავი, რომელსაც აშშ-ის სპეციალური ოპერაციების ძალები იყენებენ.

ფრენის თვალთვალის მონაცემების თანახმად, პუერტო რიკოში აშშ-ის სამხედრო ბაზებიდან, ფორტ სტიუარტიდან და ფორტ კემპბელიდან, C-17 სატვირთო თვითმფრინავებიც ჩავიდნენ.

აშშ-ის ოფიციალურმა პირმა WSJ-ს განუცხადა, რომ ეს თვითმფრინავები სამხედრო პერსონალსა და აღჭურვილობას გადაჰყავდათ. წყარომ არ დააკონკრეტა, თუ რა ტიპის ჯარისკაცებსა და აღჭურვილობას გადაჰყავდათ თვითმფრინავები.

ცნობილია, რომ კენონში ბაზირებულია 27-ე სპეციალური ოპერაციების პოლკი, ხოლო ფორტ კემპბელში განთავსებულია 160-ე სპეციალური ოპერაციების საავიაციო პოლკი, აშშ-ის სპეციალური ოპერაციების ძალების ელიტური დანაყოფი და 101-ე საჰაერო-სადესანტო დივიზია.

ეს დანაყოფები სპეციალიზირებულია მაღალი რისკის მქონე ინფილტრაციისა და გატანის მისიების მხარდაჭერაში, ასევე ახლო საჰაერო და საბრძოლო მხარდაჭერის უზრუნველყოფაში.

ჯარების გადანაწილება გამოცხადდა მას შემდეგ, რაც დონალდ ტრამპის ადმინისტრაციამ გაზარდა ზეწოლა ვენესუელის ლიდერ ნიკოლას მადუროზე და ბრძანა ქვეყანაში შემავალი და გამავალი ნავთობტანკერების დაბლოკვა.

29 ნოემბერს დონალდ ტრამპმა გამოაცხადა ვენესუელასა და „მიმდებარე საჰაერო სივრცის“ „ცის დახურვის“ შესახებ. ეს მოჰყვა აშშ-ს მიერ ვენესუელას სანაპიროსთან გემებზე განხორციელებულ მრავალრიცხოვან დარტყმებს, რომლებიც აშშ-ს აზრით, ნარკოტიკებით ვაჭრობასთან არის დაკავშირებული.

ამერიკის პრეზიდენტმა ცოტა ხნის წინ განაცხადა, რომ ის არ გამორიცხავს ვენესუელასთან ომის შესაძლებლობას.

ავტორი: ექსპრესნიუსი,

სოციალური ქსელები

„როსსტატის“ მონაცემებით, ბენზინის ფასების ყოველკვირეული ზრდა ბოლო 20 წლის განმავლობაში ყველაზე დიდია

ზელენსკი: ბელარუსის საზღვარზე აპარატურამ, რომელიც რუსულ დრონებს აკორექტირებდა, მუშაობა შეწყვიტა

დროა: პენიტენციურმა პირობა დაარღვია და ხოშტარიასთან მისი მკურნალი ექიმი არ შეუშვა

ევროსაბჭოს საპარლამენტო ასამბლეამ საქართველოზე კრიტიკული რეზოლუცია მიიღო