ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი დავით ბაქრაძე 24-25 მარტს სამუშაო ვიზიტით საფრანგეთში, ქ.პარიზში იმყოფებოდა.

სახელმწიფო მინისტრის აპარატის ინფორმაციით, ვიზიტის ფარგლებში დავით ბაქრაძემ ორმხრივი შეხვედრები გამართა ევროპულ საქმეთა სახელმწიფო მდივანთან არლემ დეზირთან, ევროპულ საქმეთა გენერალურ მდივანთან ეგლიზ კოსტასთან და საგარეო საქმეთა სამინისტროს პოლიტიკურ დირექტორთან  ნიკოლა დე რივიერთან.

შეხვედრებზე მხარეებმა ევროკავშირთან ასოცირებისა და მისივე შემადგენელი ევროკავშირთან თავისუფალი სავაჭრო სივრცის (DCFTA) შესახებ შეთანხმებების განხორციელების პროცესსა და ამ მიმართულებით საქართველოს ხელისუფლების თანმიმდევრულობაზე ისაუბრეს. ფრანგული მხარის მიერ გამოითქვა მზაობა შეთანხმებების შესრულების პროცესში დახმარებისა და ხელშეწყობის თაობაზე.

საუბარი, ასევე, შეეხო ევროკავშირთან სავიზო გეგმით(VLAP) გათვალისწინებული რეფორმებისა და საკანონმდებლო ცვლილებების მიზნით საქართველოს ხელისუფლების მიერ განხორციელებულ ღონისძებებს და აღინიშნა ვიზალიბერალიზაციის პროცესში საფრანგეთის მხარდაჭერის მნიშვნელობა.

მხარეებმა, ასევე, განიხილეს ნატოს ვარშავის სამიტისთვის მზადების საკითხები და საქართველოს მიერ მიღწეული პროგრესის ჯეროვნად ასახვის პერსპექტივები.

საფრანგეთის ხელისუფლების წარმომადგენლებმა განსაკუთრებული მადლიერება გამოხატეს ქართული მხარის მიერ საერთაშორისო სამშვიდობო ოპერაციებში, მათ შორის ევროკავშირის მისიებში შეტანილი წვლილისათვის. თავის მხრივ, დავით ბაქრაძემ მადლობა გადაუხადა ფრანგულ მხარეს საქართველოს თავდაცვისუნარიანობის გაძლიერების კუთხით გაწეული დახმარებისთვის.

შეხვედრაზე, ასევე, ისაუბრეს ქვეყნებს შორის სხვადასხვა სფეროში თანამშრომლობის გაღრმავების პერსპექტივებსა და შესაძლებლობებზე.

25 მარტს, პარიზის საერთაშორისო დიპლომატიურ აკადემიაში, საფრანგეთში საქართველოს საელჩოს ორგანიზებით, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის ინიციატივით გამოცემული წიგნის „საქართველოს ევროპული გზები“ პრეზენტაცია გაიმართა. ღონისძიებას საფრანგეთში აკრედიტებული პარტნიორი ქვეყნების საელჩოების დიპლომატები, რეგიონის მკვლევარები, ჟურნალისტები, სტუდენტები, დოქტორანტები და ქართული დიასპორის წარმომადგენლები ესწრებოდნენ. მოწვეული სტუმრების წინაშე  ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა დავით ბაქრაძემ, მწერალმა და წიგნის რედაქტორმა ზურაბ ქარუმიძემ და წიგნის ერთ-ერთმა თანაავტორმა, ხელოვნებათმცოდნე ქეთევან კინწურაშვილმა განვითარების სხვადასხვა ეტაპზე ქართულ-ევროპულ ისტორიულ და თანამედროვე კულტურულ მსგავსება-განსხვავებაზე, აგრეთვე, კრებულის მნიშვნელობაზე  ისაუბრეს და ღონისძიების მონაწილეების შეკითხვებსაც უპასუხეს.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

კობახიძე – არავის აქვს უფლება, ჩაერიოს მართლმსაჯულების დამოუკიდებლობაში, რასაც ცდილობენ ბიუროკრატები

FT: ტრამპის მეგობარი რუსულ „ნოვატეკს“ დაეხმარა ალასკაში სტრატეგიული თხევადი ბუნებრივი აირის პროექტის მშენებელ ამერიკულ კომპანიაზე კონტროლის მოპოვებაში

ორიოლის სამხედრო ქარხანაზე სარაკეტო თავდასხმის შედეგად რვა ადამიანი დაშავდა, ერთი გარდაიცვალა

ტრამპი დაემუქრა რუსეთსა და უკრაინას 200%-იანი ტარიფების დაწესებით, თუ ომი გაგრძელდება