იაპონიის პრემიერ-მინისტრმა შიგერუ იშიბამ თანამდებობა დატოვა. მან განაცხადა, რომ ტოვებს მმართველი ლიბერალური დემოკრატიული პარტიის (LDP) თავმჯდომარის თანამდებობას, რომელმაც ივლისის არჩევნებში მარცხი განიცადა. იმ დროს იშიბას მეთაურობით კოალიციამ იაპონიის პარლამენტის ზედა პალატაში უმრავლესობა დაკარგა. 2024 წელს იგივე მოხდა ქვედა პალატის არჩევნებში. შედეგად, LDP 1955 წელს დაარსების შემდეგ პირველად დარჩა უმცირესობაში პარლამენტის ორივე პალატაში.

68 წლის იშიბამ, რომელიც პრემიერ-მინისტრის თანამდებობას ერთ წელზე ნაკლები ხნის განმავლობაში იკავებდა, აღნიშნა, რომ მან უნდა აიღოს პასუხისმგებლობა პარტიის მტკივნეული დამარცხებების სერიაზე არჩევნებში. ის LDP-ის ახალი ლიდერის არჩევამდე იმუშავებს. იშიბამ ასევე განაცხადა, რომ მას შეუძლია მშვიდად წავიდეს აშშ-ის პრეზიდენტ დონალდ ტრამპთან შეთანხმების შემდეგ, რომელიც დათანხმდა ტარიფების 25%-დან 15%-მდე შემცირებას იაპონიიდან 550 მილიარდი დოლარის ინვესტიციების სანაცვლოდ. „შეერთებულ შტატებთან სავაჭრო შეთანხმების ხელმოწერით, ჩვენ გადავლახეთ მთავარი დაბრკოლება. ახლა მსურს, ესტაფეტა მომავალ თაობას გადავცე“, - განაცხადა იშიბამ. ვადამდელი არჩევნები შესაძლოა 4 ოქტომბერს ჩატარდეს. პოტენციურ კანდიდატებად სოფლის მეურნეობის მინისტრი შინჯირო კოიზუმი და ყოფილი შინაგან საქმეთა მინისტრი სანაე ტაკაიჩი განიხილება.

იშიბამ იმედი გამოთქვა, რომ მისი მემკვიდრე შეძლებს უზრუნველყოს შეთანხმების შესრულება შეერთებულ შტატებთან, გააუმჯობესოს იაპონელი ხალხის ცხოვრების დონე და გაამყაროს ეროვნული უსაფრთხოება ჩინეთს, რუსეთსა და ჩრდილოეთ კორეას შორის დაახლოების ფონზე.

Kyodo-ს ცნობით, იშიბამ, რომელმაც ივლისის ბოლოს განაცხადა, რომ გადადგომას არ აპირებდა, მიუხედავად ამისა, ასეთი გადაწყვეტილება მიიღო პარტიაში განხეთქილების თავიდან ასაცილებლად. მის პოზიციაზე შესაძლოა გავლენა მოეხდინა იაპონიის ყოფილ პრემიერ-მინისტრ იოშიჰიდე სუგასთან და მინისტრ შინჯირო კოიზუმისთან საუბარმა, რომელიც 6 სექტემბრის საღამოს შედგა.

იშიბა იაპონიის მთავრობის მეთაური 2024 წლის 1 ოქტომბერს გახდა. მან ინფლაციასთან ბრძოლის პირობა დადო და ასევე გამოაცხადა ლიბერალური და დემოკრატიული პარტიის რეფორმა, რომლის წევრებიც ადრე პარტიული საჭიროებისთვის შეგროვებული თანხების მითვისებასთან დაკავშირებულ სკანდალში იყვნენ ჩათრეულნი.

ავტორი: ექსპრესნიუსი,

სოციალური ქსელები

საქართველოს ბანკისა და კომაროვის სკოლის ერთობლივი საგანმანათლებლო პროექტის - STEM ოლიმპიადის საინფორმაციო ონლაინ შეხვედრა გაიმართება

ახალი გვერდი მობაილბანკში - უფრო მარტივი ყოველდღიურობა თიბისის მობაილბანკთან ერთად

ფორმულას ინფორმაციით, საქართველო-EU-ის წლიური დიალოგის შეხვედრა ადამიანის უფლებების საკითხზე გაუქმდა

ISFED: საზღვარგარეთ ხმის მიცემის გაუქმება არჩევნების საყოველთაობის პრინციპს დააზიანებს