აჭარის ავტონომიური რესპუბლიკის მთავრობის ყოფილმა ხელმძღვანელმა თორნიკე რიჟვაძემ თვითმკვლელობის მცდელობამდე წერილი დაწერა, რომელიც სამედიცინო პერსონალმა მის ტანსაცმელში იპოვა.

მასში რიჟვაძე რამდენიმე საკითხზე ამახვილებს ყურადღებას, მათ შორის იმ ფაქტზე, რომ მას კორუფციასა და ნარკოდილერების მფარველობაში ადანაშაულებდნენ.

აჭარის მთავრობის ყოფილი თავმჯდომარე პარტია „ქართული ოცნების“ დამფუძნებელს ბიძინა ივანიშვილს და საქართველოს პრემიერ-მინისტრ ირაკლი კობახიძეს ოჯახის დაცვის თხოვნით მიმართავს.

რიჟვაძე წერილში ასევე აღნიშნავს, რომ მისი ყველა თანამშრომელი და გარემოცვის წევრი უდანაშაულოა და ყველა „მისი ბრძანებით მოქმედებდა“.

ყოფილი ჩინოვნიკი მადლიერებითა და დადებითად საუბრობს საზღვაო ტრანსპორტის სააგენტოს ხელმძღვანელ ალექსანდრე ახვლედიანზე, რომლის იარაღითაც თვითმკვლელობა სცადა.

დავამატებთ, რომ საქართველოს შინაგან საქმეთა სამინისტროს ცნობით, აჭარის ავტონომიური რესპუბლიკის მთავრობის ყოფილი თავმჯდომარე, თორნიკე რიჟვაძე, გულმკერდის არეში ცეცხლსასროლი იარაღით მიყენებული ჭრილობით საგარეჯოს (კახეთის რეგიონი) გეოჰოსპიტალში მოათავსეს, საიდანაც ის თბილისის კლინიკაში გადაიყვანეს.

სააგენტო აღნიშნავს, რომ რიჟვაძეს სასწრაფო სამედიცინო დახმარება გაეწია: ყოფილ პოლიტიკოსს ფილტვი აქვს დაზიანებული, თუმცა მისი ჯანმრთელობის მდგომარეობა სტაბილურია.

გამოძიება დაწყებულია.

ავტორი: ექსპრესნიუსი,

სოციალური ქსელები

რეჟიმის წარმომადგენელი კობახიძე კვლავ თვს ესხმის დიდ ბრიტანეთს და მის მოქმედ პრემიერს

სქროლვა-სქრინვის სამმართველო მოქალაქეს ივანიშვილის წყევლის გამო ან ჯარიმას დაუწესებს ან 20 დღე ციხეში გაუშვებს

რეჟიმის წარმომადგენელი კობახიძე სქროლვა-სქრინვის სამსახურს ოპტიმიზმით უყურებს

კობახიძე ევროსაბჭოს რეზოლუციაზე - აბსურდია ყველაფერი, რაზეც საუბარია რეზოლუციაში, საქართველო არის მოწინავე დემოკრატიის თვალსაზრისით