როსტოვში ბოინგის ჩამოვარდნის მიზეზად უამინდობა და პილოტის შეცდომა სახელდება

2016-03-19 11:32:06, 1460 ნახვა

მსოფლიო

როსტოვის დონზე თვითმფრინავის ბოინგ 737-800 ჩამოვარდნის რამდენიმე ვერსია არსებობს, - ამის შესახებ ინფორმაციას Interfax ავრცელებს.

როგორც სააგენტო იტყობინება, ერთი ერთი ვერსიით, ბოინგი უამინდობისა და პილოტის შეცდომის გამო ჩამოვარდა. ტერაქტის ვერსია ჯერჯერობით არ განიხილება. კიდევ ერთი არსებული ვერსიით, თვითმფრინავი ტექნიკურად გაუმართავი იყო.

საგანგებო სამსახურის ინფორმაციით, პილოტები თვითმფრინავის დასვას 01:35 საათზე აპირებდნენ, მაგრამ გარკვეული მიზეზების გამო ეს არ მოხერხდა.

"ამის შემდეგ თვითმფრინავი 2 საათის განმავლობაში ქალაქს წრეს ურტყავდა, რის შემდეგაც 03:30 საათზე თვითმფრინავის დაშვებას გეგმავდნენ, მაგრამ ამას კატასტროფა მოჰყვა", - ნათქვამია საგანგებო სამსახურის სააგენტოს განცხადებაში.

მოგვიანებით შსს-ს განცხადებით გახდა ცნობილი, რომ ბოინგს ერთ-ერთი ფრთა დაშვების დროს დაუზიანდა. უამინდობის გამო, პილოტმა დროის გაყვანის მიზნით ქალაქს რამდენიმე წრე დაარტყა, ხოლო დაშვების დროს ასაფრენ ბილიკზე ფრთა დაუზიანდა, რამაც შემდგომ კატასტროფა გამოიწვია. თვითმფრინავს ცეცხლი წაეკიდა და ის ჩამოვარდა.

თვითმფრინავი, რომელიც ავიაკომპანია FlyDubai-ის ეკუთვნის, მოსკოვის დროით 03:43 საათზე ჩამოვარდა. ბოინგი როსტოვის აეროპორტიდან კერძოდ კი ასაფრენი ბილიკიდან სულ რაღაც 253 მეტრში ჩამოვარდა.

შეგახსენებთ, რომ თვითმფრინავში 62 ადამიანი იმყოფებოდა, რომლებიც კატასტროფას ემსხვერპლნენ. აქედან 55 მგზავრია და 7 ეკიპაჟის წევრი.

როგორც სააგენტო იტყობინება, მგზავრებს შორის 4 ბავშვიც იყო და 3 უცხო ქვეყნის მოქალაქე. კატასტროფის ადგილას, 700 საგანგებო სამსახურის თანამშრომელია მობილიზებული.

როსტოვის აეროპორტი დახურულია, რეისები, რომლებიც მათ უნდა მიეღოთ კრასნოდარის აეროპორტში გადაამისამართეს.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან