ACT კვლევის მიერ ჩატარებული საზოგადოებრივი აზრის კვლევის მიხედვით, საქართველოს მოსახლეობის ნახევარზე მეტი, 56%, უახლოეს 6 თვეში ქვეყანაში ეკონომიკურ კრიზისს ელის.

გარდა ამისა, ქვეყნის 36%-ის თანახმად, მათი და მათი ოჯახის ფინანსური მდგომარეობა გაუარესდა, 40%-ის თქმით, არ შეცვლილა, მხოლოდ 20% კი ამბობს, რომ მდგომარეობა გაუმჯობესდა.

საკვლევი ორგანიზაციის მიხედვით, ეს მიუთითებს, რომ ეკონომიკური კრიზისის შიში ჰიპოთეტური არ არის და არსებულ ფინანსურ მდგომარეობასაც ეფუძნება.

"როგორც ჩანს, შიში ეკონომიკური მომავლის მიმართ არ არის მხოლოდ თეორიული მოლოდინი, არამედ ეს განცდა უკვე არსებულ რეალობასაც ეფუძნება". - წერს ACTR.

ამასთან, ცხოვრების პირობების გაუარესებაზე პასუხისმგებლად მოსახლეობის 44% მთავრობას მიიჩნევს, 29%-ის აზრით კი დამნაშავე თავად ხალხია, 8% ოპოზიციას ადანაშაულებს, მხოლოდ 4% კი ამბობს, რომ ცხოვრება არ უარესდება. სხვა პასუხი გამოკითხვაში 7%-მა თქვა, ხოლო პასუხის გაცემა 8%-ს უჭირს. 

კვლევის მიხედვით, მოსახლეობის 47%-ს კვებისთვის აუცილებელი პროდუქტების ყიდვა უჭირს, სამედიცინო მომსახურებისა და წამლების შეძენა კი გამოწვევებთან 55%-ისთვის არის დაკავშირებული. ამასთან, მოსახლეობის 41%-ს აუცილებელი ტანსაცმლის ყიდვასთან დაკავშირებით პრობლემები აქვს. 

ACTR ხაზს უსვამს, რომ მოსახლეობის მოლოდინები მათ ფინანსურ გადაწყვეტილებებზეც მოქმედებს და ხარჯების შემცირებისკენ უბიძგებს.

"ეკონომიკური მდგომარეობის გაუარესების მოლოდინი არამხოლოდ მოსახლეობის განწყობებზე მოქმედებს, არამედ ცვლის მათ ფინანსურ გეგმებსაც. ეკონომიკური პესიმიზმის პირობებში მოქალაქეები იწყებენ ხარჯების გადახედვას და პირველ რიგში მზად არიან შეამცირონ ის დანახარჯები, რომლებიც არ განიხილება პირველადი საჭიროებების კატეგორიაში. სწორედ ამ პროცესში იკვეთება სექტორები, რომლებზეც ყველაზე მეტად არის მოსალოდნელი ხარჯების შემცირება, და სფეროები, რომლებიც კვლავ ინარჩუნებენ მაღალი ხარჯვის პოტენციალს". - წერს ACTR.

კვლევის თანახმად, ეკონომიკური მდგომარეობის გაუარესების შემთხვევაში მოსახლეობა, უპირველეს ყოვლისა, ხარჯებს მომსახურების სფეროში შეამცირებს. მოსახლეობის 30% ამბობს, რომ ფინანსური მდგომარეობის გაუარესების შემთხვევაში ხარჯებს მოგზაურობისა და დასვენების მხრივ შეამცირებს, ხოლო 29%-ის თქმით, გართობაზე გაწეულ ხარჯებს დაზოგავს. ტანსაცმლისა და აქსესუარების ხარჯების შემცირებას ფინანსური ვითარების გაუარესების შემთხვევაში 14% გეგმავს, 9% კი მსხვილი საყოფაცხოვრებო ტექნიკის მხრივ აპირებს ხარჯების შემცირებას. 

გამოკითხულთა 68%-ის თქმით, შემდეგი 6 თვის განმავლობაში ჯანმრთელობისა და თავის მოვლის პროდუქტების შეძენას გეგმავს, განათლებაზე ფულის დახარჯვას კი გამოკითხულთა 40% აპირებს. 29%-ის თქმით, მსხვილ ტექნიკას/ელექტროტექნიკას შეიძენენ, დასვენებასა და მოგზაურობაზე კი ფულს 26% დახარჯავს. 

გამოკითხულთა შედარებით დაბალი ნაწილი ამბობს, რომ შეიძენს ავტომობილსა და უძრავ ქონებას - 22% და 21% ამ რიგითობით. ყველაზე ცოტა ადამიანი ამბობს, რომ მომდევნო 6 თვეში ფულად ინვესტიციას გეგმავს - 19%. ACTR-ის თანახმად, ეს ასახავს, რომ "არასტაბილურ ეკონომიკურ გარემოში მოსახლეობა ნაკლებადაა მიდრეკილი რესურსების რისკიან აქტივებში განთავსებისკენ". 

"საბოლოოდ, ნათლად იკვეთება, რომ მოსახლეობაში არსებობს ეკონომიკური დაღმასვლის მოლოდინი, რაც გავლენას ახდენს მათ ფინანსურ გეგმებსა და ხარჯვით პრიორიტეტებზე. მთავარი აქცენტი კეთდება საარსებოდ მნიშვნელოვან საჭიროებებზე, ხოლო შედარებით არა სასიცოცხლოდ მნიშვნელოვანი მიმართულებები — როგორიცაა მოგზაურობა, დასვენება, გართობა — ნაკლებად პრიორიტეტული ხდება". - წერს ACTR. 

ავტორი: ექსპრესნიუსი,

სოციალური ქსელები

პროკურატურა - გურჯაანში 60 წელს გადაცილებული მამაკაცი რამდენიმე წლის განმავლობაში, ძალადობით, არასრულწლოვნის მიმართ სექსუალური ხასიათის ქმედებებს ახორციელებდა, შემდეგ კი გააუპატიურა

საქართველოს ბანკის მხარდაჭერით, 500 Global in Eurasia-ს აქსელერაციის პროგრამის XI ნაკადის გადამზადება დაიწყო

საქართველოს ბანკმა აზიის განვითარების ბანკისგან საერთაშორისო ჯილდო მოიპოვა

პროტესტის შემდეგ, ოცნებამ ჩასაბარებელი ყურძნის ფასი გააძვირა