„გახარია - საქართველოსთვის“ ერთ-ერთი ლიდერის, ნათია მეზვრიშვილის ინფორმაციით, პროკურატურა არჩევნების გაყალბების საქმის შეწყვეტისკენ მიდის.

მეზვრიშვილის თქმით, აღნიშნული გადაწყვეტილება მალე გახმაურდება.

მისი შეფასებით, საქმეზე გამოძიების შეწყვეტა „არალეგიტიმურ „ოცნებას“ ლეგიტიმაციას ვერ შესძენს“, ხოლო პროკურატურას „გაყალბების თანამონაწილედ“ დაასაბუთებს.

მეზვრიშვილის განცხადებით, პროკურატურის მიერ გამოძიების დაწყების მიზანი „გაყალბების მთავარი მტკიცებულების მძევლად აყვანა და სიმართლის დაფარვა იყო“, ხოლო პროცესში ცესკო, პროკურატურა და სასამართლო ერთობლივად მოქმედებდნენ.

„როგორც ჩემთვის ცნობილია და მოსალოდნელიც იყო, პროკურატურა მომავალში გადაწყვეტილებას არჩევნების გაყალბების საქმეზე შეწყვეტის შესახებ გაახმაურებს. ნიადაგის შესამზადებლად კობახიძე დღეს კიდევ ერთხელ იტყუება, თითქოს გაყალბების მტკიცებულებები არ არსებობს.

სინამდვილეში, სწორედ არჩევნების გაყალბების მტკიცებულებებზე დაყრდნობით განაჩენი გამოუტანა „ოცნებას“ ოდირმა, რამაც იმდენად გააოგნა, რომ წლების განმავლობაში დამკვიდრებული ენა შეცვალა და სავარაუდო დარღვევებს ფაქტები უწოდა. სწორედ ეს მტკიცებულებები იყო, რომლებმაც არჩევნების არალეგიტიმურობა დაადასტურა.

მინდა შეგახსენოთ, რომ პროკურატურის გამოძიების მიზანი გაყალბების მტკიცებულებების დაფარვა იყო. ამ პროცესში ცესკო, პროკურატურა და სასამართლო ერთობლივად მოქმედებდნენ, ფაქტობრივად გაათავისუფლეს და გადამალეს საარჩევნო სიები.

მაღისტრატ მოსამართლესთან ორი საათის განმავლობაში ვუხსნიდი არჩევნების სისტემური გაყალბების სქემას, რომ არჩევნები მხოლოდ არჩევნების დღეს არ გაყალბებულა. დავტოვე შესაბამისი მტკიცებულებებიც, მიუხედავად იმისა, რომ არჩევნებამდე თვეების განმავლობაში ვაქვეყნებდით იმ ინფორმაციას, რაზეც პროკურატურას მოქმედება უკვე უნდა დაეწყო.

თუმცა, იქ დამხვდა პროკურატურა, რომელიც, როგორც მოსალოდნელი იყო, სისტემურ გაყალბებას კი არა, ცალკეული საარჩევნო დოკუმენტების ფორმალურ გაყალბებას იძიებდა. არც ერთი კითხვა არ ეხებოდა ამომრჩევლის ნებაზე სახელმწიფოს სისტემურ ზემოქმედებას, საარჩევნო კომისიების „ოცნების“ პარტაქტივით დაკომპლექტებას, ფარულობის მასშტაბურ დარღვევას და ა.შ. ყველა კითხვა, რომელიც დაისვა, პირიქით, გამორიცხავდა სისტემურ მიდგომას.

ამიტომაც, თავიდანვე ნათელი იყო, რომ გამოძიება დაიწყო მხოლოდ იმისთვის, რომ შეწყვიტონ ის.

შეწყვეტილი გამოძიება არალეგიტიმურ „ოცნებას“ ვერ შესძენს ლეგიტიმაციას, ხოლო პროკურატურას ნამდვილად გააფორმებს არჩევნების გაყალბების თანამონაწილედ,“ - წერს ნათია მეზვრიშვილი სოციალურ ქსელში.

საქართველოს პროკურატურამ 2024 წლის 26 ოქტომბრის საპარლამენტო არჩევნების შესაძლო გაყალბების ფაქტზე გამოძიება, ცენტრალური საარჩევნო კომისიის მიმართვის საფუძველზე, 30 ოქტომბერს დაიწყო.

ავტორი: ექსპრესნიუსი,

სოციალური ქსელები

პაპუაშვილი ევროკავშირის ელჩ პაველ ჰერჩინსკის ღია წერილით მიმართავს

მეორე მსოფლიო ომის მონაწილეები ერთჯერადად 2 000 ლარს, ხოლო დაღუპულთა ოჯახების წევრები 1 000 ლარს მიიღებენ

ზელენსკიმ განაცხადა, რომ რუსეთის ფედერაციამ დაარღვია საკუთარი „ცეცხლის შეწყვეტის შეთანხმება“: დუმილის იმიტაციაც კი არ ყოფილა

CNN: კრემლი პუტინის უსაფრთხოებას აძლიერებს შეთქმულებისა და შიდა არასტაბილურობის შესახებ ჭორების ფონზე