ალასანია: არ უნდა გადავიდეთ იმ რეჟიმზე, რომ ყველა გავერთიანდეთ ივანიშვილის წინააღმდეგ

2016-03-08 22:52:50, 388 ნახვა

პოლიტიკა

"არ უნდა გადავიდეთ იმ რეჟიმზე, რომ ყველა გავერთიანდეთ ივანიშვილის წინააღმდეგ" - ამის შესახებ
თავისუფალი დემოკრატების ლიდერმა, ირაკლი ალასანიამ განაცხადა.
ალასანია მმართველ კოალიციაში მიმდინარე პროცესებს გადაცემა არჩევანში აფასებს და ამბობს, რომ კოალიცია დაშლისთვის არის განწირული.

თავისუფალი დემოკრატების ლიდერმა მოუწოდა კოალიციას, ერთმანეთში კამათის ნაცვლად, მოქალაქეების რეალურ პრობლემების მოგვარებით დაკავდნენ.

"2012 წელს კოალიცია ერთი მიზნით შედგა, რომ ხელისუფლებიდან ჩამოგვეცილებინა სააკაშვილი. ეს იყო ერთის წინააღმდეგ გაერთიანებული ძალა. ასე იყო ვარდების რევოლუციის დროსაც, როდესაც სააკაშვილმა გააერთიანა ყველა შევარდნაძის წინააღმდეგ. ასეთი კოალიციები იშლება. მაგრამ არ უნდა გადავიდეთ იმ რეჟიმზე, რომ ახლა ყველა გავერთიანდეთ ივანიშვილის წინააღმდეგ," - განაცხადა ირაკლი ალასანიამ.

ირაკლი ალასანია იქვე ქვეყანაში უსაფრთხოების საკითხების პრობლემაზე საუბრობს და ამბობს, რომ პრევენციაზე სამართალდამცავები ვერ მუშაობენ იმიტომ, რომ არის რესურსების ნაკლებობა.
ამ პრობლემის მოსაგვარებლად კი ის ხელისუფლებას უსაფრთხოების საკითხების მოგვარებაზე შეხვედრას სთავაზობს.

"ჩემი აზრით, ახლა კიდევ უფრო ახალი სიმწვავით დადგა ჩვენთვის საზოგადოებრივი უსაფრთხოების თემა. აქედან გამომდინარე, მე მინდა, როგორც პოლიტიკოსმა, ჩემი წვლილი შევიტანო და მე მინდა, მართველ გუნდს მივმართო, მოდით, შევიკრიბოთ და მოვძებნოთ ჩვენს ბიუჯეტშიც რესურსები იმისთვის, რომ შინაგან საქმეთა სამინსიტროს და უსაფრთხოების სამსახურებს მეტი რესურსი მივცეთ, რათა უფრო ეფექტურად პრევენციაზე იმუშაონ. დღეს კატასტროფული მდგომარეობა ამ კუთხით. პრევენციაზე სამართალდამცავები ვერ მუშაობენ იმიტომ, რომ არის რესურსების ნაკლებობა. ეს უნდა იყოს საზოგადების განსჯის საგანი," - განაცხადა ალასანიამ.