2025-01-14 19:52:17, 273 ნახვა
სამართალი
ადვოკატები მზია ამაღლობელის პატიმრობაში დატოვების გადაწყვეტილების გასაჩივრებას გეგმავენ
![]() 2024 წლის 14 იანვარს, ბათუმის საქალაქო სასამართლომ „ნეტგაზეთის“ და „ბათუმელების“ დამფუძნებელ მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება მოსამართლე ნინო სახელაშვილმა მიიღო, პროკურატურის მოთხოვნის საფუძველზე. მზია ამაღლობელს ბრალი 2024 წლის 13 იანვარს წარუდგინეს, სისხლის სამართლის კოდექსის 353¹ მუხლის 1-ლი ნაწილის საფუძველზე, რაც პოლიციელზე თავდასხმას გულისხმობს. დაცვის მხარემ სასამართლოზე 100 ათას ლარიანი გირაოს გამოყენების შუამდგომლობა დააყენა, თუმცა სასამართლომ ეს მოთხოვნა არ დააკმაყოფილა და ბრალდებული პატიმრობაში დატოვა. საქმეზე მომდევნო სხდომა 4 მარტს ჩაინიშნა. დაცვის მხარე: „პატიმრობა დაუსაბუთებელია“ სხდომაზე ადვოკატებმა აღნიშნეს, რომ პროკურატურის მიერ წარდგენილი შუამდგომლობა დაუსაბუთებელია და არ ემყარება რეალურ მტკიცებულებებს. მათი თქმით, მზია ამაღლობელის მიმართ პატიმრობის გამოყენება არა სამართლებრივი, არამედ პოლიტიკური გადაწყვეტილებაა. ახალგაზრდა იურისტთა ასოციაციის (საია) განცხადებით, პატიმრობის გამოყენების საფუძველი არ არსებობდა, რადგან ბრალდებულის მხრიდან ახალი დანაშაულის ჩადენის ან გამოძიებისთვის ხელის შეშლის საფრთხე არ იკვეთება. მზია ამაღლობელის დაკავების გარემოებები 2024 წლის 11 იანვარს მზია ამაღლობელი ორჯერ დააკავეს. თავდაპირველად ადმინისტრაციული წესით, საპროტესტო პლაკატის გაკვრის გამო, თუმცა რამდენიმე საათში გაათავისუფლეს. მოგვიანებით, აჭარის პოლიციის დეპარტამენტთან მომხდარი ინციდენტის შედეგად, სისხლის სამართლის გამოძიების ფარგლებში ხელახლა დააკავეს. მზია ამაღლობელი აცხადებს, რომ მისი დაკავება და ბრალდების წარდგენა არის პირდაპირი რეაქცია მის საქმიანობასა და სამოქალაქო პოზიციაზე. პატიმრობის გასაჩივრება საია და საქმეში ჩართული ადვოკატები ბათუმის საქალაქო სასამართლოს განჩინებას სააპელაციო სასამართლოში გაასაჩივრებენ. მათი განცხადებით, მზია ამაღლობელის მიმართ პატიმრობის გამოყენება არის უკანონო და სასამართლომ უპირველესად პოლიტიკური დავალება შეასრულა. საზოგადოების რეაქცია მზია ამაღლობელის პატიმრობაში დატოვებას პროტესტი მოჰყვა როგორც მედიასაშუალებების, ისე სამოქალაქო აქტივისტებისა და უფლებადამცველების მხრიდან. მათ აღნიშნეს, რომ სასამართლო კიდევ ერთხელ იქცა პოლიტიკური ბრძოლის იარაღად. საია აცხადებს, რომ ამაღლობელის საქმე ნათლად ასახავს ქვეყანაში მართლმსაჯულების პრობლემებს და მოუწოდებს სასამართლოს, გადაწყვეტილება გადახედოს.
|
რედაქტორის რჩევით
![]() გამკაცრებული კანონმდებლობა და დაჯარიმებული დემონსტრანტების უსასრულო სია
![]() პუტინმა ბრძანება გასცა "გამარჯვების მუზეუმში" უკრაინაში წარმოებული ომის გამოფენის მოსაწყობად
ომი უკრაინაში![]() პუტინთან საუბრის შემდეგ, ტრამპმა და ზელენსკიმ ტელეფონით ისაუბრეს
პენტაგონის ხელმძღვანელი: უკრაინის ომამდელ საზღვრებთან დაბრუნება არარეალურია
ვიდეო/LIVE საზოგადოებრივი მაუწყებლის სამეურვეო საბჭოს სხდომა - 3 თებერვალი, 2025
|