საქართველოს მეხუთე პრეზიდენტმა სალომე ზურაბიშვილმა ზუგდიდში გამართულ აქციაზე სიტყვით გამოსვლისას აღნიშნა, რომ ბოლომდე ჩართული იქნება საქართველოსთვის ბრძოლაში და ქვეყნის მეგობრების მხარდაჭერის მობილიზებაში.

„ჩვენ ახლა ვართ ბრძოლაში, რომელიც უსათუოდ იქნება გამარჯვებული, სხვა გზა არ დაუტოვეს არავის. მე ვარ თქვენთან და თქვენ გაქვთ ჩემი იმედი, მაგრამ არანაკლებად მაქვს თქვენი იმედი, თითოეულის. ეს ბრძოლა ვერ მოიგება მხოლოდ ერთი ადამიანის იმედით. ის მოიგება მაშინ, თუ ყველანი ბოლომდე ვიქნებით ჩართული. მე პირობას ვდებ, რომ ბოლომდე ვიქნები ჩართული ყველა იმ ძალისხმევით, რაც მე შემიძლია ამ ქვეყნისთვის,“ - განაცხადა სალომე ზურაბიშვილმა.

პრეზიდენტმა განსაკუთრებით გამოყო საქართველოს საერთაშორისო მეგობრების მხარდაჭერა და აღნიშნა, რომ დღეს ქვეყანას ევროპის და ამერიკის მხარეზე ამდენი მეგობარი იშვიათად ჰყოლია.

„ჩვენი მეგობრები ევროპაში და ამერიკაში, რომლებიც საქართველოზე გულშემატკივრობენ, დღეს ყველაფერს აკეთებენ ქვეყნის მომავლის დასაცავად ჩრდილოელი მეზობლის გავლენისგან. ეს მხარდაჭერა ძალიან მნიშვნელოვანია, თუმცა მათ ეს ვალდებულება იმიტომ აქვთ, რომ ხედავენ თქვენს მტკიცე და მრავალფეროვან პროტესტს. ეს პროტესტი მთელ საქართველოს მოიცავს და ის საერთაშორისო ყურადღებას იპყრობს,“ - აღნიშნა ზურაბიშვილმა.

პრეზიდენტის თქმით, საქართველოს საზოგადოება დღეს გამორჩეულად დემოკრატიული, შეგნებული და მშვიდობიანია, რაც გარდამტეხ როლს თამაშობს ქვეყნის კრიზისიდან მშვიდობიანად გამოსაყვანად.

„ეს მრავალფეროვანი პროტესტი, რომელიც ყველა ქალაქში მიმდინარეობს, საბოლოოდ მიგვიყვანს თავისუფალ და დემოკრატიულ არჩევნებამდე. ეს არის ერთადერთი გზა, რომ ქვეყანა გამოვიდეს არსებული კრიზისიდან და დადგეს განვითარების სწორ გზაზე,“ - განაცხადა მან.

ზურაბიშვილმა ასევე ხაზი გაუსვა რეგიონების მნიშვნელობას და აღნიშნა, რომ ზუგდიდით დაიწყო რეგიონებში სიარული, რათა არავინ იგრძნოს, რომ პროტესტი მხოლოდ თბილისს ეხება. მისი თქმით, პროტესტი მთელი ქვეყნისაა და ის უნდა დასრულდეს მშვიდობიანი და სამართლიანი არჩევნებით.

ავტორი: ექსპრესნიუსი,

სოციალური ქსელები

საკრებულოების შუალედურ არჩევნებში მონაწილეობას მხოლოდ ოცნება და ლელო მიიღებს

ეკა კუპატაძე თამარ ბაჩალიაშვილის მშობლებს მხარდაჭერას უცხადებს

შიო III-მ უკრაინაში მოსკოვის საპატრიარქოს წარმომადგენელ მიტროპოლიტ ონოფრეს ინტრონიზაციის წლისთავი მიულოცა

ვიღაცა მაგრად თამაშობს - დადიანიძის დედა მისი შვილის სახელით გავრცელებულ FB-პოსტებზე