2024-12-10 10:32:23, 546 ნახვა

---

CPJ „TV პირველის“ გადამღებ ჯგუფზე თავდასხმაზე - ჩატარდეს სრული გამოძიება და პასუხისმგებელი პირები სასწრაფოდ დააკავონ

ჩატარდეს სრული გამოძიება და პასუხისმგებელი პირები სასწრაფოდ დააკავონ,- ასე ეხმაურება ჟურნალისტთა დაცვის კომიტეტი (CPJ) „TV პირველის“ გადამღებ ჯგუფზე თავდასხმას.

CPJ აღნიშნავს, რომ „TV პირველის“ რეპორტიორ მაკა ჩიხლაძესა და ოპერატორ გიორგი შეწირულზე თავდასხმა, შემაშფოთებელია.

„საქართველოს ხელისუფლებამ სასწრაფოდ უნდა დააკავოს პასუხისმგებელი პირები, რათა ჟურნალისტების უსაფრთხოება უზრუნველყოს, „ტვ პირველის“ გადამღებ ჯგუფზე თავდასხმას წინ უძღოდა „პუბლიკას“ ჟურნალისტზე, მინდია გაბაძეზე თავდასხმა“,- წერს CPJ.

შეგახსენებთ, 7 დეკემბერს, „TV პირველის“ ჟურნალისტ მაკა ჩიხლაძესა და ოპერატორ გიორგი შეწირულს ნიღბიანი პირები სამსახურებრივი მოვალეობის შესრულების დროს ფიზიკურად გაუსწორდნენ. ორივე მათგანი მიღებული დაზიანებებით ინგოროყვას კლინიკაში გადაიყვანეს.

სპეციალურმა საგამოძიებო სამსახურმა განცხადება გაავრცელა, სადაც ნათქვამია, რომ მაკა ჩიხლაძესა და ოპერატორ გიორგი შეწირულზე მომხდარ თავდასხმაზე გამოძიება საქართველოს სისხლის სამართლის კოდექსის 154-ე მუხლის მეორე ნაწილით დაიწყო.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი