„დამირეკეს, რომ საქმეა აღძრული ჟურნალისტურ საქმიანობაში ხელის შეშლის გამო“ - ნიკო მანაგაძე საგამოძიებო სამსახურში დაიბარეს

2024-11-21 11:43:45, 335 ნახვა

სამართალი

აქტივისტი ნიკო მანაგაძე აცხადებს, რომ სპეციალურ საგამოძიებო სამსახურში დაიბარეს.

მანაგაძე სოციალურ ქსელში წერს, რომ როგორც საგამოძიებო სამსახურიდან აცნობეს, საქმე ჟურნალისტურ საქმიანობაში ხელის შეშლის ფაქტს ეხება.

„სპეციალური საგამოძიებო სამსახურიდან დამირეკეს, სისხლის სამართლის საქმეა აღძრული ჟურნალისტურ საქმიანობაში ხელის შეშლის გამო და უნდა გამოცხადდეთ უწყებაშიო.

რა მოხდა: „იმედის“ ჟურნალისტს პირდაპირ ეთერში ვკითხე, გმობდნენ თუ არა მათ კოლეგაზე („მთავარი არხის“ ოპერატორზე) პოლიციის მხრიდან ძალადობას, კამერის დამტვრევას და მის უკანონოდ დაკავებას. და უთხრეს თუ არა ამის შესახებ თავიანთ მაყურებელს, გაუშვეს თუ არა ამის ამსახველი კადრები ეთერში. (ტელევიზია, რომელიც მუდმივად 7 ნოემბერზე და თავიანთი ჟურნალისტების მიმართ არასათანადო მოპყრობაზე აპელირებს წინა ხელისუფლების კონტექსტში).
და ტრაგიკომიკური ისაა, რომ იმ „პოლიციელებზე“ კი არ აღძრეს საქმე, რომლებმაც (რბილად რომ ვთქვათ) მართლა ხელი შეუშალეს მედიის წარმომადგენელს ბრუტალური მეთოდებით მუშაობაში, ფიზიკურად გაუსწორდნენ, კამერა დაულეწეს და დააკავეს, მე გამომაცხადეს ჟურნალისტურ საქმიანობაში ხელის შემშლელად ამაზე კითხვა რომ დავუსვი პირდაპირ ეთერში მათ „კოლეგებს“.

ტელეკომპანია „იმედმა“ მოგვმართა ამასთან დაკავშირებითო“,- წერს მანაგაძე „ფეისბუქზე“.

ცნობისთვის, გუშინ, 20 ნოემბერს სპეციალურმა საგამოძიებო სამსახურმა გაავრცელა ინფორმაცია, რომლის მიხედვითაც, თბილისში, ჭავჭავაძისა და მელიქიშვილის გამზირებზე აქციის მიმდინარეობის დროს, სხვადასხვა ტელეკომპანიის თანამშრომლებისთვის ჟურნალისტურ საქმიანობაში უკანონოდ ხელის შეშლის ფაქტზე, გამოძიება დაიწყეს.

სამსახურის ცნობით, გამოძიება საქართველოს სისხლის სამართლის კოდექსის 154-ე მუხლის პირველი და მეორე ნაწილებით მიმდინარეობს.

ავტორი: ექსპრესნიუსი,