შოლცი, მაკრონი და ტუსკი არჩევნებზე - მრავალი დარღვევა და ამომრჩევლის დაშინება შემაშფოთებელია

2024-11-07 15:25:23, 1515 ნახვა

პოლიტიკა

გერმანიის კანცლერი ოლაფ შოლცი, საფრანგეთის პრეზიდენტი ემანუელ მაკრონი და პოლონეთის პრემიერ-მინისტრი დონალდ ტუსკი ერთობლივ განცხადებას ავრცელებენ.

როგორც ლიდერების ერთობლივ განცხადებაშია აღნიშნული, ისინი ქართველი ხალხის ევროპულ და დემოკრატიულ მისწრაფებებს მხარს უჭერენ, თუმცა საქართველოს ევროკავშირში გაწევრიანებაზე დიალოგის დაწყებას მხარს იქამდე ვერ დაუჭერენ, ვიდრე ქვეყანაში რეფორმები არ გატარდება.

“ჩვენ კიდევ ერთხელ გამოვთქვამთ შეშფოთებას საქართველოში საპარლამენტო არჩევნების ჩატარებასთან დაკავშირებით, ვხელმძღვანელობთ რა საერთაშორისო სადამკვირვებლო მისიის წინასწარი დასკვნით. განსაკუთრებით შემაშფოთებელია მრავალი დარღვევა და ამომრჩევლის დაშინება, რამაც უარყოფითი გავლენა მოახდინა საზოგადოების ნდობაზე პროცესის მიმართ.

ჩვენ მოვუწოდებთ, რომ მოხდეს ყველა დარღვევის სწრაფი და გამჭვირვალე გამოძიება და ყურადღებით გავეცნობით საერთაშორისო სადამკვირვებლო მისიის საბოლოო დასკვნას.

ჩვენ მხარს ვუჭერთ ქართველი ხალხის ევროპულ და დემოკრატიულ მისწრაფებებს. მშვიდობიანი შეკრებისა და გამოხატვის თავისუფლება ფუნდამენტური უფლებაა დემოკრატიულ საზოგადოებაში და ის დაცული უნდა იყოს. ჩვენ მოვუწოდებთ ინკლუზიური დიალოგისკენ ყველა პოლიტიკურ ძალასთან და სამოქალაქო საზოგადოების ორგანიზაციებთან, რათა ეს მიზანი მიღწეულ იქნას.

26 ოქტომბრის საპარლამენტო არჩევნებამდე ევროპულმა საბჭომ ხაზგასმით აღნიშნა, რომ საქართველომ ევროპული გზიდან გადაუხვია და აუცილებელი იყო თავისუფალი და სამართლიანი არჩევნების ჩატარება.

სანამ საქართველო არ შეცვლის თავის ამჟამინდელ კურსს და არ მოახდენს ხელშესახები რეფორმების გატარებისთვის ძალისხმევის დემონსტრირებას, განსაკუთრებით ბოლო დროს მიღებული კანონების გაუქმებით, რომლებიც ეწინააღმდეგება ევროპულ ფასეულობებს, ჩვენ ვერ დავუჭერთ მხარს საქართველოსთან გაწევრიანების შესახებ მოლაპარაკებების დაწყებას“,- აღნიშნულია ერთობლივ განცხადებაში, რომელიც საქართველოში გერმანიის ელჩმა, პეტერ ფიშერმა სოციალურ ქსელში გაავრცელა.