კულება - სთხოვო ელჩს, კონსულტაციებისთვის უკრაინა დატოვოს, უკიდურესად მკაცრი ფორმაა, მაგრამ საქართველოს ხელისუფლება ამას იმსახურებს

2023-07-04 09:22:20, 810 ნახვა

პოლიტიკა

სთხოვო ელჩს, თავის მთავრობასთან კონსულტაციებისთვის უკრაინა დატოვოს, დიპლომატიაში ეს უკიდურესად მკაცრი ფორმაა, მაგრამ საქართველოს ხელისუფლება ამას იმსახურებს,- ამის შესახებ უკრაინის საგარეო საქმეთა მინისტრი დმიტრო კულება აცხადებს.

კულებას თქმით, საქართველოს ელჩს უკრაინის დიპლომატიურ უწყებაში 4 ივლისს დაიბარებენ და მასთან "მკაცრი საუბარი" გაიმართება.

"4 ივლისს საქართველოს ელჩი იქნება უკრაინის საგარეო საქმეთა სამინისტროში. მასთან გაიმართება მკაცრი საუბარი. ის გაემგზავრება საქართველოში. კონსულტაციები მან თავის ხელისუფლებასთან უნდა გაიაროს - საით მიდის საქართველო, რატომ ანგრევენ უკრაინა-საქართველოს ურთიერთობებს და რა უნდა გააკეთონ, რომ ამ ურთიერთობებს უშველონ.

როდესაც სახელმწიფო რაღაცით უკმაყოფილოა, პირველი რეაქცია პროტესტის გამოხატვაა. მეორე არის ელჩის კონსულტაციებისთვის გამოძახება და რეაქციის მესამე დონე, რამდენიმე საფეხურით მაღალი სიმძიმით, არის სთხოვო ამ ქვეყნის ელჩს, თავის მთავრობასთან კონსულტაციებისთვის უკრაინა დატოვოს. დიპლომატიაში ეს უკიდურესად მკაცრი ფორმაა, მაგრამ საქართველოს ხელისუფლება ამას იმსახურებს.

თუ საქართველოს ხელისუფლებას მიაჩნია სააკაშვილი საფრთხედ შიდა პოლიტიკისთვის, მიეცით მას საშუალება, საქართველო დატოვოს და იცხოვრეთ მანდ საქართველოში თქვენთვის. გააგრძელეთ რუსეთთან დაახლოება, თუ ეს ასე გინდათ, თუმცა ჩვენ ვხედავთ ბრმა, უბრალოდ ცხოველურ პოლიტიკას, მიიყვანონ სააკაშვილი სიკვდილამდე",- ამბობს კულება.

შეგახსენებთ, გუშინ, 3 ივლისს უკრაინის პრეზიდენტმა, ვოლოდიმირ ზელენსკიმ განაცხადა, რომ ქვეყნის დიპლომატიურ უწყებას დაავალა, გამოიძახოს საქართველოს ელჩი და მოსთხოვოს მას, ექსპრეზიდენტ მიხეილ სააკაშვილის კიევისთვის გადაცემის საკითხზე თბილისთან კონსულტაციების გამართვის მიზნით, ქვეყანა 48 საათის განმავლობაში დატოვოს.

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,