2023-06-14 11:46:10, 602 ნახვა

---

სარჯველაძე - დეოლიგარქიზაციის კანონპროექტმა შეიძლება, გარკვეული პრობლემები თვითონ ოპოზიციას შეუქმნას, ისეთი პირებისთვის, როგორიც კეზერაშვილია, წინაღობები გააჩინოს

მე, როგორც იურისტს, მეჩვენება, რომ ბოლო დასკვნაში, რაც ვენეციის კომისიის მიერ არის წარმოდგენილი, ხშირ შემთხვევაში გადაჭარბებული და გაზვიადებულია ის ინტერპრეტაციები და რისკები, რომლებიც ამ შემთხვევაში შეიძლება იყოს დანახული,- ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, მიხეილ სარჯველაძემ განაცხადა.

 შეკითხვაზე, რატომ იგზავნება ვენეციის კომისიაში დოკუმენტები, თუ მათი მოსაზრებები არ გვაინტერესებს, მიხეილ სარჯველაძემ განაცხადა, რომ კომისიის მოსაზრებები მნიშვნელოვანია, მაგრამ არ უნდა დაგვავიწყდეს, რომ ამას მაინც რეკომენდაციები ჰქვია.

„შესაბამისად, აქ მთავარია, მოვისმინოთ არგუმენტაცია და შეიძლება, დავუშვათ ასეთი რამ, რომ შესაძლოა, არგუმენტაცია იყოს არასრული ან გარკვეულ შემთხვევაში გადაჭარბებული და გაზვიადებული“, - განაცხადა სარჯველაძემ.

შეკითხვაზე, როგორი იქნება ევროკომისიის გადაწყვეტილება კანონის მიღების შემთხვევაში, როცა არსებობს ვენეციის კომისიის ბოლო დასკვნა, სარჯველაძემ განაცხადა, შეფასების შემდეგ თუ აღმოჩნდება, რომ ეს არ არის ის, რასაც საქართველოდან ევროკომისია ელოდა, გადაწყვეტილება გადაიხედება.

„ეს ითქვა, გაცხადებულია და, ვფიქრობ, პოზიცია აბსოლუტურად მართებულია. ყოველ შემთხვევაში, ყველას უტოვებს შესაძლებლობას, რომ გარკვეული შეუთანხმებლობის აღმოფხვრის კვალდაკვალ, რომელიც ევროკომისიის პოზიციასა და ვენეციის კომისიას შორის რეალურად არსებობს, ჩვენი გადაწყვეტილებები მივიღოთ. თქვენ გახსოვთ ოპოზიციის დაჟინებული მცდელობები და მათ შორის, კარგად გვახსოვს ირაკლი კობახიძის გაფრთხილება, ისე არ აღმოჩნდეს, რომ ამ რეკომენდაციის შესრულება მერე უხერხულობებს გამოიწვევს თვითონ ოპოზიციისთვისო. თქვენ გახსოვთ, ეს პარლამენტის ტრიბუნიდან უთხრა ოპონენტებს ირაკლი კობახიძემ და ამას მოჰყვა ცოტა ისეთი დამოკიდებულება, არა, ირაკლი კობახიძე ცდება, ასე არ იქნებაო. ისე აგიხდათ ყველაფერი, მერე აღმოჩნდა, რომ აბსოლუტურად ყველაფერი ზუსტად იმავე თანმიმდევრობით, რაც უკრაინულ მოდელთან დაკავშირებით გაკეთდა, ზუსტად ეს უკრაინული მოდელი, მათი მოწონებული კანონი აღმოჩნდა მათთვისვე არახელსაყრელი.

ასე არ არის. მგონია, რომ ოპოზიციონერებმა, უბრალოდ, გადაჭარბებული მოლოდინები შექმნეს თავიანთივე თავისთვის, როდესაც, ასე ვთქვათ, დიდი ფსონები გააკეთეს ამ კანონპროექტის ინიცირებასთან დაკავშირებით. მერე აღმოჩნდა ზუსტად ისე, როგორც ირაკლი კობახიძე აფრთხილებდა, რომ ეს შეიძლება, შემდეგ არცთუ კომფორტული მოსჩვენებოდათ თვითონ ოპოზიციონერებს. იმიტომ, რომ, რასაკვირველია, ეს მათ მიერ დასახული მიზნების განხორციელების ინსტრუმენტი ვერცერთ შემთხვევაში ვერ გახდებოდა. ახლა რაც შეეხება პირიქით, შეიძლება, რომ გარკვეული პრობლემები თვითონ ოპოზიციას შეუქმნას? სხვათა შორის, კი, შეიძლება. მაგალითად, ისეთი პირებისთვის, როგორიც იგივე კეზერაშვილია, ამან შეიძლება, გარკვეული წინაღობები გააჩინოს“, - განაცხადა მიხეილ სარჯველაძემ საქართველოს პირველი არხის გადაცემაში „თავისუფალი ხედვა“.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი