მიგვაჩნია, რომ ასეთ კანონს შეუძლია პოტენციური საფრთხე შეუქმნას საქართველოს ევროატლანტიკურ ინტეგრაციას, - ასე ეხმაურება ამერიკის შეერთებული შტატების სახელმწიფო დეპარტამენტის პრესსპიკერი ნედ პრაისი "უცხოური აგენტების შესახებ" "ხალხის ძალის" მიერ მომზადებულ კანონპროექტს.

როგორც ნედ პრაისმა ბრიფინგზე განაცხადა, აღნიშნული კანონპროექტი არა ამერიკულ ან სხვა რომელიმე, არამედ რუსეთის და უნგრეთის მსგავს კანონმდებლობას ეფუძნება.

"ჩვენ ნამდვილად გვაქვს ღრმა შეშფოთების მიზეზები. ჩვენთვის ცნობილია ამ კანონპროექტის საქართველოს პარლამენტში დარეგისტრირების შესახებ. ჩვენ ღრმად შეშფოთებულები ვართ მისი შედეგებით სიტყვის თავისუფლებასა და დემოკრატიაზე საქართველოში. ეს ღრმა შეშფოთება ჩვენ პირდაპირ გამოვუხატეთ საქართველოს მთავრობაში ჩვენს თანამოსაუბრეებს. შემოთავაზებული კანონი სტიგმატიზაციას მოახდენს და ჩაახშობს საქართველოს მოქალაქეების დამოუკიდებელ ხმებს, რომლებიც უკეთესი მომავლის მშენებლობას ესწრაფვიან. ჩვენ გვჯერა, რომ ასეთმა დანაკარგმა შეიძლება შეარყიოს საქართველოს ევროატლანტიკური ინტეგრაცია. თქვენს კითხვაზე ჩვენს კანონებთან, მათ შორის, “უცხოელი აგენტების რეგისტრაციის შესახებ” კანონთან (FARA) შედარებასთან დაკავშირებით, გეტყით, რომ ეს განცხადებები, რომ თითქოს, საქართველოს კანონპროექტი ეფუძნება FARA-ს, არის აშკარად მცდარი. ეს (ქართული) კანონპროექტი, როგორც ჩანს, ეფუძნება რუსეთის და უნგრეთის მსგავს კანონმდებლობას და არა FARA-ს ან რომელიმე სხვა ამერიკულ კანონმდებლობას.", - განაცხადა ნედ პრაისმა.

შეგახსენებთ, "ხალხის ძალის" წარმომადგენლებმა გუშინ, 15 თებერვალს გამართულ საგანგებო ბრიფინგზე განაცხადეს, რომ პარლამენტში „უცხოური გავლენის გამჭვირვალობის შესახებ“ კანონპროექტს დააინიცირებენ. ანტიდასავლურ მოძრაობაში ამბობენ, რომ შეიქმნება უცხოური გავლენის აგენტების რეესტრი, სადაც დარეგისტრირდება ყველა ის არასამეწარმეო იურიდიული პირი და მედიასაშუალება, რომელთა შემოსავლების 20%-ზე მეტი უცხოური ძალების მიერ ფინანსდება.

ავტორი: ექსპრესნიუსი,

სოციალური ქსელები

ადმინისტრაცია ადასტურებს, რომ მიხეილ ყაველაშვილი ირანში აიათოლა ალი ხამენეის დაკრძალვის ცერემონიალს დაესწრება

გახარიას პარტიამ პარლამენტში ჩხუბზე გამოძიების მოთხოვნით პროკურატურას მიმართა

„თეგეტამ“ საგზაო-სამშენებლო სექტორის წარმომადგენლებს ბიზნესის მხარდაჭერის კონცეფცია გააცნო

დიდი ბრიტანეთი თავდაცვის ბიუჯეტს დამატებით 15 მილიარდი გირვანქით ზრდის