ქსენია სობჩაკი - მოვუწოდებ საქართველოს ხელისუფლებასა, გამოიჩინონ თანაგრძნობა სააკაშვილის მიმართ

2023-02-14 16:44:17, 1117 ნახვა

პოლიტიკა

მოვუწოდებ საქართველოს ხელისუფლებასა და სასამართლო უწყებას, გამოიჩინონ თანაგრძნობა ძალიან ცუდად მყოფი ადამიანის მიმართ,- ამის შესახებ რუსი ჟურნალისტი, ქსენია სობჩაკი Telegram-ზე წერს.

სობჩაკი მიხეილ სააკაშვილზე საუბრობს და ორ ვიდეოს ავრცელებს.

ერთ-ერთი "ვივა მედში" გადაღებული კადრებია, ხოლო მეორე - მისი ინტერვიუ ბუბა კიკაბიძესთან, რომელშიც კიკაბიძე ჰყვება, როგორ სთხოვა უკრაინის პრეზიდენტს, ვოლოდიმირ ზელენსკის მიხეილ სააკაშვილის გადარჩენა.

"პირველი ვიდეო: კადრები მიხეილ სააკაშვილის საავადმყოფოდან და აშკარა დემონსტრირება იმ მდგომარეობისა, რომელშიც ის ამჟამად იმყოფება.

მეორე ვიდეო: ჩემი ინტერვიუ ვახტანგ კიკაბიძესთან, მისი ბოლო ინტერვიუ. რომელშიც ის ჰყვება, თუ როგორ სთხოვა უკრაინის პრეზიდენტს, ვოლოდიმირ ზელენსკის მისი მეგობრის, მიხეილ სააკაშვილის გადარჩენა.

ამასთან, ერთი კვირის წინ თბილისის სასამართლოს მოსამართლემ არ დაიჯერა, რომ სააკაშვილი ავად იყო და უარი თქვა მის გათავისუფლებაზე ან სისხლის სამართლის სასჯელის გადადებაზე.

როგორც ჩანს, ახლა არის ის დრო, როცა ადამიანებმა ირგვლივ უპრეცედენტო სისასტიკის დანახვისას, საკუთარ თავში კეთილშობილება და წყალობა იპოვონ. მე მოვუწოდებ საქართველოს ხელისუფლებასა და სასამართლო უწყებას, გამოიჩინონ თანაგრძნობა ძალიან ცუდად მყოფი ადამიანის მიმართ",- წერს სობჩაკი.

შეგახსენებთ, 6 თებერვალს თბილისის საქალაქო სასამართლომ მიხეილ სააკაშვილის გათავისუფლების ან სასჯელის გადავადების შუამდგომლობა არ დააკმაყოფილა. გადაწყვეტილება მოსამართლე გიორგი არევაძემ მიიღო.

ამასთან, 11 თებერვალს CNN-მა მიხეილ სააკაშვილის "ვივამედში" გადაღებული კადრები გამოაქვეყნა. კადრებში, რომელიც CNN-ს ექსპრეზიდენტის ამერიკელმა ადვოკატმა, მასიმო დანჯელომ მიაწოდა და რომელიც 2022 წლის 6 ოქტომბრით თარიღდება, მესამე პრეზიდენტის გონების კარგვის ეპიზოდი ჩანს.

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,