თურქეთმა სტოკჰოლმში მომხდარი ინციდენტის გამო ნატო-ს გაფართოების შესახებ სამმხრივი შეხვედრა გააუქმა

2023-01-26 17:58:24, 1435 ნახვა

მსოფლიო

თურქეთი მიმდინარე ესკალაციის გამო აზრს ვერ ხედავს შვედეთისა და ფინეთის ნატო-ში გაწევრიანებასთან დაკავშირებით სამმხრივი ფორმატის გამართვაზე, ამიტომაც შეხვედრას აუქმებს, - ამის შესახებ თურქეთის საგარეო საქმეთა მინისტრმა მევლუთ ჩავუშოღლუმ პრესკონფერენციაზე განაცხადა.

„დღევანდელ პირობებში სამმხრივ შეხვედრას აზრი არ აქვს. გადაიდო, რადგან არსებული მდგომარეობა მასზე იმოქმედებდა, ატმოსფერო არ იქნებოდა ჯანსაღი. ჩვენ ასევე ვხედავთ, რომ შვედეთს არ გადაუდგამს სერიოზული ნაბიჯები შეთანხმების შესასრულებლად“, - განაცხადა მინისტრმა.

ჩავუშოღლუმ ასევე აღნიშნა, რომ შვედეთში ყურანის დაწვა სიძულვილის დანაშაული და რასისტული ქმედება იყო.

„შვედეთის მთავრობა, ამ საზიზღარი ქმედების დაშვებით, დანაშაულის პარტნიორი გახდა “, - განაცხადა მინისტრმა.

მისი თქმით, პროვოკაციის ორგანიზატორების ერთ-ერთი მიზანი შვედეთის ნატო-ში გაწევრიანებაა.

„შვედეთმა უნდა გადაწყვიტოს: სურს თუ არა ნატო-ში გაწევრიანება ? ამ ქმედებების ერთ-ერთი მიზანია შვედეთის ნატო-ში გაწევრიანების თავიდან აცილება. ისინი თანამშრომლობენ ქურთისტანის მუშათა პარტიასთან და წევრობის პროცესში ნაღმებს ყრიან. შვედეთმა უნდა გააუვნებელყოს ეს ნაღმები“, - განაცხადა თურქმა მინისტრმა.

ცნობისთვის, სტოკჰოლმში ყურანის საჯარო დაწვის შემდეგ თურქეთმა შვედეთისგან ინციდენტის გამოძიებასთან დაკავშირებით სამმხრივი მემორანდუმის შეთანხმებების შესრულება მოითხოვა.

შვედეთის პრემიერ-მინისტრმა დაგმო სტოკჰოლმში თურქეთის საელჩოს წინ ყურანის დაწვა. თუმცა, პროკურატურამ დანაშაულის არარსებობის გამო საქმის გახსნაზე უარი თქვა.

მოგვიანებით, პრეზიდენტმა რეჯეფ თაიფ ერდოღანმა განაცხადა , რომ შვედეთი არ უნდა ელოდეს თურქეთის მხარდაჭერას ნატო-ში გაწევრიანებაზე, რადგან ეს გამოხატავს რელიგიური მრწამსის უპატივცემულობას და მხარს უჭერს ტერორისტულ ორგანიზაციებს.

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,