გაეროში რუსმა დიპლომატმა თანამდებობა დატოვა - „არასდროს მრცხვენოდა ჩემი ქვეყნისა და საქმის ისე, როგორც ამ წლის 24 თებერვალს“

2022-05-23 16:45:20, 967 ნახვა

მსოფლიო

ბორის ბონდარევმა, ჟენევაში გაეროში რუსეთის მისიის მრჩეველმა, საჯაროდ დაგმო რუსეთის ომი უკრაინის წინააღმდეგ, გადადგა და გააკრიტიკა რუსეთის საგარეო საქმეთა მინისტრი სერგეი ლავროვი.

ბონდარევმა აღნიშნა, რომ მისი მიმართვა, შესაძლოა დაგვიანებული, მაგრამ პირადად მისთვის ძალიან მნიშვნელოვანი იყო.

„ოცდაათი წლის განმავლობაში მიწევდა ჩვენი საგარეო პოლიტიკის სხვადასხვა მონაცვლეობის დაკვირვება, მაგრამ არასდროს მრცხვენოდა ჩემი ქვეყნის და ჩემი საქმის ისე, როგორც ამ წლის 24 თებერვალს. პუტინის მიერ გაჩაღებული აგრესიული ომი უკრაინასთან და ფაქტობრივად, მთელ დასავლურ სამყაროსთან, - არა მხოლოდ უკრაინელი ხალხის წინააღმდეგ დანაშაულია, არამედ, ალბათ, ყველაზე მძიმე დანაშაული რუსეთის ხალხის წინააღმდეგ, რომელმაც თამამი ასო Z-ით გადაკვეთა ყველა იმედი.“- განაცხადა ბონდარევმა.

მისი თქმით, ამ ომის ინიციატორებს მხოლოდ ერთი რამ უნდათ - სამუდამოდ დარჩნენ ხელისუფლებაში, იცხოვრონ პომპეზურ სასახლეებში, ცურავდნენ მდიდრულ იახტებზე, ისარგებლონ შეუზღუდავი ძალაუფლებით და სრული დაუსჯელობით.

გარდა ამისა, ბონდარევმა ხაზგასმით აღნიშნა, რომ პუტინის რეჟიმი მზად არის ამისთვის ბევრის სიცოცხლე გასწიროს.

ბონდარევმა ასევე, გააკრიტიკა რუსეთის საგარეო საქმეთა სამინისტროს მუშაობა, რომლის სიცრუისა და არაპროფესიონალიზმის დონე წლიდან წლამდე იზრდებოდა.

„მინისტრი ლავროვი ამ სისტემის დეგრადაციის კარგი ილუსტრაციაა. ის 18 წლის განმავლობაში პროფესიონალი და განათლებული ინტელექტუალიდან, რომლის თანასწორობაც სამინისტროს ბევრ თანამშრომელს სურდა, გადაიქცა ადამიანად, რომელიც მუდმივად ავრცელებს განცხადებებს, რომლებიც ეწინააღმდეგება თითოეულს. ემუქრება მსოფლიოს ბირთვული იარაღით! დღეს საგარეო საქმეთა სამინისტრო დიპლომატიით არ არის დაკავებული, ის თესავს სიცრუეს, აღძრავს სიძულვილს და ომს. დიპლომატია ემსახურება ადამიანთა ვიწრო წრის პირად ინტერესებს, რომლებსაც არაფერი აქვთ საერთო რუსული საზოგადოების რეალურ საჭიროებებთან“, - დასძინა ბონდარევმა.

ბონდარევის თქმით, ახლა რუსეთს აგრესიული პოლიტიკის გამო მოკავშირეები აღარ ჰყავს. მისივე თქმით, კარიერის გაგრძელება სურს, თუმცა მიიჩნევს, რომ ახლა საჯარო სამსახურში დარჩენა სამშობლოს ღალატის ტოლფასია.

ავტორი: თეონა დორეული, ექსპრესნიუსის რეპორტიორი 2018 წლიდან