ბათუმში მუჰამმედ შუამავლის მოვლინების დღე აღნიშნეს

2015-01-05 20:12:01, 446 ნახვა

მუსლიმური სამყარო მუჰამმედ შუამავლის დაბადებიდან 1443-ე წლისთავს ზეიმობს.

მორწმუნეებს დღესასწაული აჭარის მთავრობის, დიპლომატიური კორპუსისა და სხვადასხვა რელიგიური კონფესიის წარმომადგენლებმა მიულოცეს.
მსოფლიოში მუსლიმური რელიგიის გავრცელება სწორედ მექაში დაბადებულ მუჰამედს უკავშირდება, რომელსაც მორწმუნეები ღმერთთან შუამავლად მიიჩნევენ.

მუჰამმედ შუამავალი დედამიწას 1443 წლის წინ, 571 წელს მოევლინა და ამ დღეს მუსლიმები ყოველწლიურად აღნიშნავენ. დღესასწაული მოძრავად ითვლება, რადგანაც მთვარის კალენდრით აღინიშნება.
საქართველოში დღეისათვის სხვადასხვა სტატისტიკური მონაცემებით მუსლიმი მოსახლეობის რაოდენობა 11 პროცენტს აღწევს. მათგან 200 დან 250 ათასამდე ( ზუსტი სტატისტიკური მონაცემები არ არსებობს) ადამიანი აჭარაში ცხოვრობს.
აჭარის რეგიონში დღეისათვის დაახლოებით 214 ჯამეა. რომელთაგან უძველესი აგებულია 1823 წელს. ბოლო 25 წლის განმავლობაში კი რეგიონში 14 ჯამე აშენდა. დანარჩენი ჯამეები მე-19 საუკუნეს ან მეოცე საუკუნის დასაწყისს მიეკუთვნებიან და უმეტესად ქართული ტრადიციული ხუროთმოძღვრების ნიმუშებს წარმოადგენენ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან