ფონ კრამონი „კავკასიური სახლის“ წერილზე - ბრძანდებით რა სახელგანთქმული მწერლები, დამეთანხმებით, რომ კარგად წერა კარგად კითხვის შედეგია

2020-05-28 15:22:27, 2201 ნახვა

კომენტარი

კავკასიურმა სახლმა ღია წერილით მიმართა ევროპარლამენტარ ვიოლა ფონ კრამონს, სადაც საუბარი იყო პოლიტპატიმრების გათავისუფლების საკითხე.

„ცალკეული კრიმინალების ციხიდან დახსნის ნაცვლად, დაგვიდექით გვერდით, რათა ერთად გადავარჩინოთ საქართველოს რეგიონები“, - ვკითხულობთ ღია წერილში.

ვიოლა ფონ კრამონი, ევროპარლამენტის წევრი, გამოეხმაურა "კავკასიური სახლის" ღია წერილს.

მისი თქმით, მან წერილის კითხვა დაიწყო დიდი ინტერესით და დაასრულა ასეთივე დიდი იმედგაცრუებით. ფონ კრამონი "კავკასიური სახლის" ღია წერილის ავტორებს მიმართავს - "ბრძანდებით რა სახელგანთქმული მწერლები, ფილოლოგები და აკადემიკოსები, უცილობოდ დამეთანხმებით, რომ კარგად წერა შედეგია კარგად კითხვის".

„მივიღე თქვენი წერილი. წერილის კითხვა დავიწყე დიდი ინტერესით და დავასრულე ასეთივე დიდი იმედგაცრუებით. ამ პროცესში გამახსენდნენ „პერსონაჟები“ გივი მარგველაშვილის ნაწარმოებიდან „Verfasser Unser“, რომლებიც გაიძახიან – „ვითხოვთ უკეთეს ნაწერს“ (“Wir fordern eine bessere Verfassung”).

ბრძანდებით რა სახელგანთქმული მწერლები, ფილოლოგები და აკადემიკოსები, უცილობოდ დამეთანხმებით, რომ კარგად წერა შედეგია კარგად კითხვის.

მე, როგორც საქართველოს და მისი ხალხის უპირობო და უკომპრომისო მეგობარს, არაერთხელ გამომიხატავს ჩემი პოზიცია უახლეს მოვლენებზე. ყველაზე ცხადად იგი წარმოჩინდა ჩემს ვებ გვერდზე 13 მაისს გამოქვეყნებულ განცხადებაში, რომელიც ასევე ფართოდ გააშუქა ქართულმა მედიამ.

სამწუხაროა, რომ თქვენ გადაწყვიტეთ გამოგეტოვებინათ ესოდენ მნიშვნელოვანი ნაბიჯი, რომელსაც განცხადების წაკითხვა ეწოდება. რომ არა ეს, ამაცილებდით მე ამ წერილის წერის , ხოლო საკუთარ თავს, ამ წერილის კითხვის უხერხულობას.

თქვენ რომ მე წინასწარ შემხმიანებოდით, როგორც ეს „საერთო პოლიტიკური და ეთიკური ღირებულებების“ მქონე მოკავშირეს შეშვენის, კიდევ ერთხელ სიამოვნებით განგიმარტავდით ჩემს პოზიციას და ამ გზით თავიდან აირიდებდი თქვენი წერილის სიმცდარითა და დეზინფორმაციით გაჯერებას", - წერს ევროპარლამენტარი.

ფონ კრამონი ყურადღებას ამახვილებს იმაზეც, რომ ის მიხეილ სააკაშვილის რეჟმის კრიტიკოსია და ამიტომ ზედმეტად მიაჩნია ამ რეჟმის შეხსენება მისთვის.

"ასევე ზედმეტია ჩემთვის სააკაშვილის რეჟიმის სისასტიკეების შეხსენება. ეს ყველაფერი ჩემთვის კარგადაა ცნობილი. გერმანიის პარლამენტის წევრობისას, მე გახლდით სააკაშვილის მთავრობის ხმამაღალი კრიტიკოსი. ამის გამო მან და მისმა გუნდმა შემრაცხა პერსონა ნონ გრატად და აქტიურად (მაგრამ არა ყოველთვის წარმატებით) ცდილობდნენ საქართველოში ჩატარებულ ღონისძიებებში ჩემს დაბლოკვას. 2012-ში, მეც, მილიონობით ქართველის გვერდით, იმედით და კეთლი მოლოდინით შევყურებდი ქართულ ოცნებას. ვაი რომ იმედი გახუნდა.

გარდა ამისა, არა ვსაჭიროებ თქვენს მეურვეობაში. შესანიშნავად მომეხსენება ერთიანი ნაციონალური მოძრაობის საეჭვო მეთოდები და სწორედ ამიტომ საქართველოს შესახებ ინფორმაციას უდიდესწილად ვიღებ ექპერტებისგან, მკვლევარებისგან, დიპლომატებისგან და ხშირად რიგითი ქართველებისგან", - აღნიშნავს ფონ კრამონი.

მისი თქმით, წერილში ავტორები ამტკიცებენ, რომ ის „აქტიურად ლობირებდა რამდენიმე დატუსაღებული ქართველი პოლიტიკოსის გათავისუფლებას“. მისი თქმით, ეს არის სრული და მტკნარი სიცრუე.

"თქვენ ამტკიცებთ, რომ მე „აქტიურად ვლობირებდი რამდენიმე დატუსაღებული ქართველი პოლიტიკოსის გათავისუფლებას“. ეს არის სრული და მტკნარი სიცრუე. არც ჩემს ოფიციალურ განცხადებაში და არც ინტერვიუებში არ მომითხოვია ვინმეს გათავისუფლება. ასევე სიცრუე როცა ამტკიცებთ, რომ მე თითქოს ვიღაც „პოლიტიკურ პატიმრად“ გამოვაცხადე. არასოდეს გამომიყენებია ეს სიტყვები. მე ჩემს საქმიანობას ვეკიდები უდიდესი პასუხისმგებლობით, ხოლო თქვენი ქვეყნის მომავალს უდიდესი ზრუნვით. სწორედ ამიტომ ვარჩევ სიტყვებს მაქსიმალური სიზუსტით. ამავდროულად მოველი, რომ თქვენ აირჩევთ ამ სიტყვების სწორად წაკითხვას სანამ დაუსაბუთებელი ბრალდებების წაყენებას მიყოფდით ხელს.

ჩემი რჩევა (და არა თხოვნა ან მოთხოვნა) საქართველოს მთავრობის მიმართ არის იგივე რაზეც ხალხი 2012 წელს ოცნებობდა. დემოკრატიული პრინციპების პატივისცემა და ობიექტური, გამჭვირვალე და პოლიტიკური ჩარევისგან თავისუფალი სასამართლო სისტემა. სამწუხაროდ, როგორც დამოუკიდებელი ექსპერტები და მკვლევარები ადასტურებენ, ამ სფეროებში ძალიან სამწუხარო უკან დახევის ტრენდი გამოიკვეთა.

უცილობოა, რომ ყველა დამნაშავე უნდა გასამართლეს. თუმცა, დამნაშავეებიც კი იმსახურებენ სამართლიან სასამართლოს რომელის გადაწყვეტილებებიც დაეყრდნობა მყარ მტკიცებულებებს და თავისუფალი იქნება ხელისუფლების ჩარევისგან. სხვა შემთხვევაში გამოვა რომ ყველანი ერთად ვაშენებთ არა დემოკრატიულ საქართველოს, არამედ რეჟიმს რომელსაც თქვენ და სხვა დისიდენტები ათწლეულების განმავლობაში ებრძოდით.

ჩვენ ვთანხმდებით საქართველოს უნიკალური ეკოსისტემის შეფასებისას. არაერთხელ ვყოფილვარ რა საქართველოში, მოხიბლული ვარ თქვენი ქვეყნის უზარმაზარი პოტენციალით მწვანე და მდგრადი ენერგიის წარმოების სფეროში. ჩვენ, საქართველოს მეგობრები, ვმუშაობთ თავდაუზოგავად, რათა „ახალი მწვანე შეთანხმების“ დადებითი შედეგები გასცდეს ევროკავშირის საზღვრებს და საქართველოსთან ერთად სარგებელი მოუტანოს აღმოსავლეთ პარტნიორობის სხვა ქვეყნებსაც. ეს ნაბიჯები გაამყარებს საქართველოს ევროპულ ოჯახში ურყევი ინტეგრაციის გზას, რომელსაც ქართველმა ხალხმა არაერთხელ გამოუცხადა მხარდაჭერა“, - წერს ვიოლა ფონ კრამონი.

ავტორი: ანი მელაძე, ექსპრესნიუსის რეპორტიორი 2019 წლიდან