„ანტისემიტიზმი რესპუბლიკაზე თავდასხმაა“ - საფრანგეთში მასშტაბური მანიფესტაციები გაიმართა

2019-02-20 13:40:22, 4099 ნახვა

მსოფლიო

საფრანგეთის სხვადასხვა ქალაქებში რიგითმა მოქალაქეებმა და პოლიტიკოსებმა ანტისემიტიზმის წინააღმდეგ მანიფესტაციები გამართეს, - ამის შესახებ Euronews იუწყება.

მედია საშუალების ინფორმაციით, მანიფესტანტებმა საფრანგეთში მცხოვრებ ებრაელ ხალხს მხარდაჭერა გამოუცხადეს. ამ ქმედებით მათ სურდათ, ებრაელი ერისთვის ეჩვენებინათ, რომ მათზე თავდასხმები და ებრალების სასაფლაოების განადგურება საფრანგეთის რესპუბლიკის ფასეულობებზე თავდასხმის ტოლფასია.

მანიფესტაციაში მონაწილეობა ქვეყნის ყოფილმა პრეზიდენტმა ფრანსუა ოლანდმაც მიიღო.

"ანტისემიტიზმი ეს ჩვენს რესპუბლიკაზე თავდასხმაა, ეს თავდასხმაა ჩვენი ქვეყნის ღირებულებებზე, ეს მცდელობაა საზოგადოებაში არეულობის მოხდენის. აქ იმისთვის ვართ შეკრებილები, რომ განვაცხადოთ - ეს მიუღებელია!", - განაცხადა ოლანდმა.

მომხდართან დაკავშირებით განცხადება კიდევ ერთმა ყოფილმა ლიდერმა ნიკოლა სარკოზიმ გააკეთა. ექს-პრეზიდენტს მიაჩნია, რომ ასეთ ქმედებებს მკაცრი პასუხი უნდა გაეცეს.

"თავიანთი ქმედებებით თავდამსხმელები პროვოკაციებს აწყობენ და სახელმწიფოს შეურაცხყოფას აყენებენ. ხელისუფლებამ მათ მკაცრი პასუხი უნდა გასცეს და დარწმუნებული ვარ, რომ ასეც იქნება", - აღნიშნა ნიკოლა სარკოზიმ.

მედიის ცნობით, საფრანგეთმა ომის დროს ებრაელების დეპორტაცია მხოლოდ 1995 წელს აღიარა. დღეს საფრანგეთის მასშტაბით ნახევარ მილიონზე მეტი ებრაელი ცხოვრობს, რაც ქვეყნის მთლიანი მოსახლეობის 1 პროცენტსაც არ შეადგენს.

Euronews-ი იტყობინება, რომ რამდენიმე დღის წინ ანტისემიტების მხრიდან თავდასხმის მსხვერპლი აკადემიკოსი ალენ ფინკელკრაუტი გახდა. ანტისემიტიზმის კიდევ ერთი ფაქტი სამშაბათს მოხდა, როდესაც უცნობმა პირებმა ებრაელების თითქმის 100 საფლავი წაბილწეს. მომხდარს ქვეყნის პრეზიდენტი ემანულ მაკრონი გამოეხმაურა, რომელიც აღნიშნულ სასაფლაოზე პატივისცემის გამოსახატად მივიდა.

"აქ იმიტომ მოვედი, რომ მხარდაჭერა და სოლიდარობა გამოვუცხადო ებრაელ ხალხს, როგორც პირადად ჩემი ასევე მთელი ერის მხრიდან. აქ ვარ იმისთვის, რომ ყველას დავანახო ჩვენ ერთნი ვართ ანტისემიტიზმის წინააღმდეგ. ბრძოლას ყველა ფრონზე გავაგრძელებთ", - განაცხადა მაკრონმა.

ცნობისთვის, ომის დროს "სიკვდილის ბანაკებში" 75 ათასზე მეტი ფრანგი ებრაელის დეპორტაცია მოხდა. მოკლული ებრაელების საპატივსაცემოდ პარიზსში 2005 წელს მემორიალი შოა გაიხსნა.