2015-06-13 13:39:40, 1489 ნახვა
მსოფლიო
ავღანეთში პოლიციის შენობაზე თავდასხმის შედეგად 20-მდე სამართალდამცველი დაიღუპა
ავღანეთში ჰელმანდის პროვინციაში მოძრაობა „თალიბანსა“ და სამართალდამცველებს შორის მომხდარი დაპირისპირებისას სულ მცირე 17 პოლიციელი დაიღუპა.
გავრცელებული ცნობით, თალიბები მუსა-კალას რაიონში პოლიციის შენობას თავს დაესხნენ. სამართალდამცველებსა და დაჯგუფების წევრებს შორის დაპირისპირება რამდენიმე საათის განმავლობაში გრძელდებოდა.
ადგილობრივი ხელისუფლების ინფორმაციით, ინციდენტის შედეგად „თალიბანის“ ათამდე წევრი დაიღუპა. გასულ წელს ავღანეთიდან ნატოს სამხედროს ძალების გაყვანის შემდეგ თალიბების მხრიდან თავდასხმები გახშირდა. მსგავსი ინციდენტების შედეგად ათობით სამართალდამცველი და სამხედრო მოსამსახურე იღუპება.
ავტორი: ირაკლი მანაგაძე , ექსპრესნიუსის რეპორტიორი 2009 წლიდან
epn.ge (@expressnews.ge)
