2018-10-25 11:03:26, 1304 ნახვა

---

პრემიერი: სალომე ზურაბიშვილს ჩვენგან აქვს სრული მხარდაჭერა - თუ ვინმე არ არის ჩამოყალიბებული, ივანიშვილის მესიჯი მათ ეხებოდათ

„სალომე ზურაბიშვილს აქვს სრული მხარდაჭერა ჩვენი პოლიტიკური გუნდის მხრიდან. თუ რომელიმე ადამიანი არ არის ჩამოყალიბებული თავის არჩევანში, პარტიის თავმჯდომარის მესიჯის სწორედ მათ ეხებოდათ“, - ამის შესახებ საქართველოს პრემიერ-მინისტრმა მამუკა ბახტაძემ მთავრობის ადმინისტრაციაში გამართულ პრესკონფერენციაზე განაცხადა.

მან კიდევ ერთხელ განმარტა, თუ რატომ უჭერს მხარს „ქართული ოცნება“ სალომე ზურაბიშვილს:

„ჩვენ არაერთხელ გავაკეთეთ განცხადება, თუ რატომ ვუჭერთ მხარს თავისუფალ კანდიდატს სალომე ზურაბიშვილს. მინდა კიდევ ერთხელ განვმარტო, რომ დღეს „ქართული ოცნება“ წარმოდგენილია პარლამენტში საკონსტიტუციო უმრავლესობით, ისევე როგორც წარმოდგენილია უმრავლესობით ადგილობრივ მუნიციპალიტეტებში. ჩვენი გუნდის პოლიტიკური ფილოსოფია გახლავთ საქართველოში საპარლამენტო დემოკრატიის მშენებლობა. შესაბამისად, ეს არის ძალიან მნიშვნელოვანი პარტიული წარმომადგენლობა ყველა დონეზე. მაგრამ, ამავე დროს ჩვენ, ჩვენი კონსტიტუციის მიხედვით, პრეზიდენტი წარმოგვიდგენია სწორედ ზეპარტიულ ფიგურად, ადამიანად, რომელსაც შეუძლია ითამაშოს თავისუფალი და ზეპარტიული როლი იმ შემთხვევაში, როდესაც ქვეყანას ეს დასჭირდება. ამასთან ერთად, ჩვენი პოლიტიკური ფილოსოფიის განუყოფელი ნაწილია ის მთავარი ამოცანა, რომელიც უნდა გადავჭრათ, ეს გახლავთ საქართველოს შეუქცევადი ინტეგრაცია ევროპულ და ევროატლანტიკურ სტრუქტურებში. სწორედ ამ ამოცანებიდან, ამ მიზნებიდან და რაც მთავარია, ამ ფილოსოფიიდან გამომდინარე მივიღეთ ეს გადაწყვეტილება. შესაბამისად, ბიძინა ივანიშვილის მესიჯიც ეკუთვნოდა სწორედ იმ ადამიანებს, თუ ასეთები ჯერ კიდევ არიან და არ არიან ჩამოყალიბებული თავიანთ პოზიციაში, რომ სალომე ზურაბიშვილის მხარდაჭერა ნიშნავს ამ მიზნების და ფასეულობების მხარდაჭერას“, - განაცხადა მამუკა ბახტაძემ.

ცნობისთვის, „ქართული ოცნების“ თავმჯდომარე ბიძინა ივანიშვილმა პარტიის ზოგიერთ წევრს, რომლებიც სალომე ზურაბიშვილს მხარს არ უჭერენ, მოუწოდა, გუნდის პოზიციას პატივის სცენ: "აბსოლუტური უმრავლესობა დარწმუნდა, რომ ზურაბიშვილის მხარდაჭერა სწორი პოზიცია იყო, თუმცა ზოგიერთ წევრს შევახსენებ, რომ ნუ კეკლუცობენ და პარტიის პოზიციას პატივი სცენ. ძალიან ღირსეული კანდიდატია ქალბატონი სალომე და ძალიან ბევრ იმსახურებს. ამავდროულად ვისარგებლებ შემთხვევით და საზოგადოებას, ასევე ჩვენს ყოფილ მხარდამჭერებს მივმართავ, რომლის ნაწილიც არ არის ჩამოყალიბებული, რომელ კანდიდატს უჭერენ მხარს, ხმა მისცენ სალომე ზურაბიშვილს. ეს კვლევებშიც ჩანს - დიდი შანსი გვაქვს პირველივე ტურში გავიმარჯვოთ, მეორე ტურში კითხვის ნიშანიც არაა. მინდა მივმართო ყოფილ მხარდამჭერებს და მხარდამჭერთა იმ ნაწილს, რომელიც დღეს კიდევ მერყეობს ქალბატონ სალომესთან დაკავშირებით. ის არის ძალიან ღირსეული კანდიდატი და გთხოვდით, აქტიურები იყავით 28 ოქტომბერს". 

 

---

ავტორი: ,

---

დღის თემა

მთავარი თემა

ინტერვიუ - ექსკლუზივი