რუსეთის მიერ საქართველოს მიწების ოკუპაციით გამოწვეული არსებული პრობლემების მიუხედავად, ქვეყანას ბოლო წლების განმავლობაში უზარმაზარი წინსვლა აქვს, - ამის შესახებ სასქართველოს პრემიერ-მინისტრი მამუკა ბახტაძე ამერიკულ გამოცემა The Hill-ში გამოქვეყნებულ წერილში აცხადებს. 

პუბლიკაციაში, რომლის სათაურია "აშშ-საქართველოს ურთიერთობა ახლა უფრო მნიშვნელოვანია, ვიდრე ოდესმე ყოფილა", პრემიერი აღნიშნავს, რომ საქართველო წლიდან წლამდე აუმჯობესებს მთლიანი შიდა პროდუქტის მაჩვენებელს, ექსპორტის მოცულობებს, გააჩნია ჯანსაღი და მზარდი ტურიზმის სექტორი. 

"მსოფლიო ბანკის „ბიზნესის კეთების" 2018 წლის ანგარიშის თანახმად, საქართველო მსოფლიო რეიტინგში მე-9 ადგილს იკავებს განხორციელებული რეფორმების რაოდენობის მიხედვით და უმაღლესი ნიშნული აქვს ევროპის და ცენტრალური აზიის რეგიონში. სულ ცოტა ხნის წინ, საერთაშორისო სავალუტო ფონდმა საქართველოს 2018 წლის ზრდის პროგნოზს გადახედა მატების მიმართულებით და  ახლა 5.5%-იან  ზრდას პროგნოზირებს, მოსალოდნელზე უფრო ძლიერი ეკონომიკური შედეგების დამსახურებით", - წერს პრემიერი. 

მამუკა ბახტაძე ყურადღებას ამახვილებს რუსეთთან საქართველოსმთავრობის სამშვიდობო პოლიტიკაზე, რომელსაც საპასუხო ნაბიჯები არ მოჰყოლია. 

"ათი წლის წინ, ჩვენი ჩრდილოელი მეზობელი, რუსეთი საქართველოში შემოიჭრა და ჩვენი სუვერენული ტერიტორიის 20 პროცენტი დაისაკუთრა. მოსახლეობის რიცხოვნობით, ეს იქნებოდა რუსების მიერ მიჩიგანის, ოჰაიოს, ინდიანას, ვისკონსინის, ილინოისის, აიოვას, მინესოტას და სამხრეთ დაკოტას - მთელი ამერიკის შუა დასავლეთი ზოლის, ასევე ფლორიდისა და ტეხასის ოკუპაციის ტოლფასი. მიმდინარე ოკუპაციის კონტექსტში არც კონფლიქტი გვსურს და არც - დაპირისპირება. ვაგრძელებთ მუშაობას რუსეთის მიერ ჩვენი მიწების ოკუპაციის მშვიდობიან და პრაქტიკულ გადაწყვეტაზე. ვცდილობთ, დაძაბულობის დეესკალაცია მოვახდინოთ, მაგრამ რუსეთის ხელისუფლება დღემდე არ გამოხმაურებია ჩვენს მიმართვას დამაკმაყოფილებელი გადაწყვეტის პოვნის თაობაზე", - წერს საქართველოს პრემიერ-მინისტრი. 

მამუკა ბახტაძე კონფლიქტის მშვიდობიანი გადაწყვეტის პროცესში ხაზს უსვამს აშშ-ის როლს, რაც, მისი შეფასეით, დანარჩენი მსოფლიოსთვის სამაგალითო იქნება. 

"ჩვენ გვჯერა, რომ ძლიერი და აყვავებული საქართველო რუსეთის ეროვნულ ინტერესებშია და საფრთხედ არ უნდა ვიყოთ აღქმული. უფრო მეტიც, მოსკოვმა საქართველოს არ უნდა უყუროს დასავლეთთან დაპირისპირების კონტექსტში. საქართველო-აშშ-ის პარტნიორობა ყოველთვის ასეთი მყარი იყო და ის ძლიერდება ტრამპის ადმინისტრაციის პირობებში. მჯერა, რომ ამერიკას უშუალო ინტერესი გააჩნია ქართულ-რუსული კონფლიქტის მშვიდობიან და სამართლიან გადაწყვეტაში. აშშ-ის წარმატებული ჩართულობა ამ კონფლიქტის მოგვარების საქმეში სამაგალითო იქნება დანარჩენი მსოფლიოსთვის და დიპლომატიის ძალის დემონსტრირებად გვესახება. დღეს, საქართველო მომართულია, მეტ ეკონომიკურ სიმაღლეებზე გავიდეს - გახდეს გლობალური ვაჭრობის რეგიონული ცენტრი და აშშ-ის ბიზნესის დასაყრდენი ევრაზიის ტერიტორიაზე. საქართველო ხელს უწყობს სტაბილურობას რეგიონში კარგი მმართველობის, ეკონომიკური განვითარებისა და მეზობლებთან თანამშრომლობის გზით. დარწმუნებული ვარ, თავისუფალი და ერთიანი საქართველო იქნება მშვიდობისა და კეთილდღეობის მიმართ ჩვენი ორი ერის საერთო ინტერესების შემკვრელი ჩვენს რთულ სამეზობლოში და მთელს მსოფლიოში", - ნათქვამია მამუკა ბახტაძის წერილში. 

პუბლიკაცია დღეს პოლიტიკურ გამოცემა The Hill-ში გამოქვეყნდა, რომელსაც აშშ-ში დიდი აუდიტორია ჰყავს. 

ავტორი: ,

სოციალური ქსელები

უნგრეთის ყოფილ საგარეო მინისტრს შესაძლო მექრთამეობისთვის სამ წლამდე თავისუფლების აღკვეთა ემუქრება

შეერთებულმა შტატებმა სანქციები დააწესა საქართველოში დაფუძნებული კრიპტო კომპანია SHPS Shelbit-ის წინააღმდეგ

ფაშინიანმა და ტრამპმა ტელეფონით ისაუბრეს TRIPP პროექტის მიმდინარე მდგომარეობაზე.

რუბიო: აშშ-მ TRIPP-ისა და შუა დერეფნის განვითარებისთვის 201 მილიონი დოლარი გამოყო