2018 და 2022 წლის ფეხბურთის მსოფლიო ჩემპიონატების მასპინძელი ქვეყნის არჩევის პროცესს გამოიძიებენ

2015-05-27 14:09:52, 1630 ნახვა

მსოფლიო

შვეიცარიის იუსტიციის ფედერალური დეპარტამენტი 2018 და 2022 წლის ფეხბურთის მსოფლიო ჩემპიონატების მასპინძელი ქვეყნის არჩევის პროცესს გამოიძიებს.

როგორც უწყების განცხადებაშია ნათქვამი, საქმე კორუფციის, სამსახურეობრივი უფლებამოსილების გადამეტების და ფულის გათეთრების ბრალდებით აღიძრა.

დეპარტამენტის თანამშრომლებმა FIFA-ს ოფისიდან საბუთები და ელექტრონული მატარებლები ამოიღეს. დეპარტამენტმა შვეიცარიის საფინანსო ინსტიტუტებს FIFA-ს მაღალჩინოსნების საბანკო ანგარიშების შესახებ ინფორმაცია მოსთხოვა.

ცნობისთვის, 2018 წელს ფეხბურთის მსოფლიო ჩემპიონატი რუსეთში, ხოლო 2022 წელს ყატარში უნდა გაიმართოს.

შეგახსენებთ, შვეიცარიის პოლიციამ კორუფციაში ეჭვმიტანილი ფეხბურთის საერთაშორისო ფედერაციის (FIFA-ს) 9 მაღალჩინოსანი დააკავა. დაკავებულთა შორის FIFA-ს ვიცე-პრეზიდენტები ჯეფრი უები, ეუხენიო ფიგერედო და აღმასკომის შვიდი წევრი არიან. ორგანიზაციის მოქმედი თავმჯდომარე იოზეფ ბლატერი ეჭვმიტანილთა სიაში ჯერჯერობით არ არის. ოპერაცია დღეს დილით, ციურიხის ერთ-ერთ ხუთვარსკვლავიან სასტუმროში ჩატარდა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან