ტეხასის სკოლაში 10 ადამიანის მკვლელობაში ბრალდებული 17 წლის მოზარდია

2018-05-19 11:23:08, 2240 ნახვა

მსოფლიო

ტეხასის სკოლაში ცეცხლი 17 წლის დიმიტრიოს პაგოურტზისმა გახსნა, რომელიც პოლიციამ უკვე დააკავა.

ამის შესახებ ინფორმაციას ტეხასის შტატის პოლიცია ავრცელებს.

„სანტა ფეს სკოლაში სროლაში ეჭვმიტანილი გალვესტონის ოლქის ციხეშია მოთავსებული. ის ბრალდებულია დამამძიმებელ გარემოებაში მკვლელობაში და აკრძალული აქვს გირაოს სანაცვლოდ გათავისუფლება“, - ნათქვამია პოლიციის განცხადებაში.

სანტა-ფეს სკოლაში სროლის შედეგად დაღუპულთა უმეტესობა მოსწავლეა. სამართალდამცველების მიერ გამოქვეყნებული ბოლო მონაცემებით, დაიღუპა 10 ადამიანი, ხოლო 12 დაშავდა. ისინი ახლომდებარე საავადმყოფოებში გადაიყვანეს. დაშავებულთა შორის პოლიციის ერთი ოფიცერია.

შენობაში, ასაფეთქებელი ნივთიერებებიც აღმოაჩინეს. თვითმხილველების ცნობით, სანტა-ფეს სკოლის ხელოვნების ოთახში შეიარაღებული პირი შეიჭრა და ცეცხლი გახსნა.

მომხდარს უკვე გამოეხმაურა აშშ-ის პრეზიდენტი დონალდ ტრამპი.

„ვგლოვობთ სიცოცხლის დანაკარგს და მხარდაჭერას ვუცხადებთ ყველას, ვისაც ტეხასში მომხდარი საშინელი თავდასხმა შეეხო. მივმართავ სანტა-ფეს უმაღლესი სკოლის სტუდენტებს, მათ ოჯახებს, მასწავლებლებსა და პერსონალს – ჩვენ ამ ტრაგიკულ საათში თქვენთან ერთად ვართ და მუდამ თქვენთან ვიქნებით“,– წერს ტრამპი „ტვიტერის“ საკუთარ გვერდზე.

ამერიკული მედიის მონაცემებით, ეს აშშ-ის სკოლებში ბოლო ერთი კვირის განმავლობაში სროლის მესამე შემთხვევაა, ხოლო წლის დასაწყისიდან – 22-ე.

We grieve for the terrible loss of life, and send our support and love to everyone affected by this horrible attack in Texas. To the students, families, teachers and personnel at Santa Fe High School – we are with you in this tragic hour, and we will be with you forever... pic.twitter.com/LtJ0D29Hsv
— Donald J. Trump (@realDonaldTrump) 18 мая 2018 г.