ქუთაისში, ერთ-ერთ ბარში თამბაქოს მოწევის ფაქტზე 2 პირი დააკავეს

2018-05-04 13:22:40, 1566 ნახვა

სამართალი

სამართალდამცავებმა ქუთაისში თამბაქოს მოწევის ფაქტზე 2 პირი დააკავეს. შემთხვევა გუშინ, ერთ-ერთ კაფე-ბარში მოხდა.

როგორც „ექსპრესნიუსს“ შსს-ს საზოგადოებასთან ურთიერთობის სამსახურში განუცხადეს, დაწესებულების ერთი სტუმარი მოწევის წესის დარღვევის გამო დააჯარიმეს, ხოლო ორი სტუმარი, პოლიციისადმი დაუმორჩილებლობისთვის დააკავეს.

„ერთ-ერთ კაფე-ბარში, საღამოს საათებში გამოძახება იყო თამბაქოს კანონის დარღვევის შესახებ. საპატრულო პოლიციის თანამშრომლები შემთხვევის ადგილზე დროულად გამოცხადდნენ. სამი მოქალაქე არღვევდა თამბაქოს შესახებ კანონს. ერთ-ერთი მათგანი დაჯარიმდა შესაბამისი მუხლით, ხოლო ორ მათგანს პატრულმა მოუწოდა, რომ აღარ მოეწიათ დახურულ შენობაში. ისინი არ დაემორჩილნენ პოლიციას და წინააღმდეგობა გაუწიეს, რის გამოც ორივე მათგანი დააკავეს ადმინისტრაციულ სამართალდარღვევათა კოდექსის 166-ე და 173-ე მუხლებით”, - განაცხადეს შინაგა საქმეთა სამინისტროში.

შსს-ს ინფორმაციით, ის კაფე-ბარიც დაჯარიმდა, სადაც აღნიშნული შემთხვევა მოხდა. როგორც უწყებაში განმარტეს, დაჯარიმების მიზეზი ობიექტში მოწევის ამკრძალავი ნიშნის არ არსებობდა გახდა.

Patreon P მხარი დაუჭირე "ექსპრესნიუსს" →

ავტორი: ,

სოციალური ქსელები