„ჩემთვის ყველაზე წმინდას შეურაცხყოფაა, როდესაც ადამიანი გამოდის და ამბობს, რომ ქრისტეს სახელით ამას თავში უნდა ჩავარტყათ, იმას ყური უნდა მოვაჭრათ და ვაგინოთ“, - ამის შესახებ პრეზიდენტმა გიორგი მარგველაშვილმა გადაცემა „პოლიტმეტრში“ „ქართული მარშის“ წევრების მიერ „რუსთავი 2“-ის ჟურნალისტებზე მომხდარ თავდასხმასთან დაკავშირებით განაცხადა.

როგორც მან აღნიშნა, არ შეიძლება ერთმანეთს გრძნობების გამოხატვა ავუკრძალოთ:

„დღევანდელი რეალობიდან ბევრად უფრო ნათელია მიზანია, რომ იქნებ მრევლი იყოს ცოტა უფრო მეტად შემწყნარებლური და არ გამოხატავდეს ქრისტიანობას აგრესიული თავდასხმების ფორმით. კი არ ავუკრძალოთ ერთმანეთს გრძნობების გამოხატვა, არამედ ვასწავლოთ საზოგადოებას როგორ ცივილიზებულად იურთიერთონ ერთმანეთთან. შეურაცხყოფაზე თუ ვსაუბრობთ, მე სულ შეურაცხყოფილი ვარ, როცა მესმის, რომ თურმე ქრისტიანობა არის მეორისთვის თავის გატეხვის რელიგია. შეურცხყოფილი ვარ, როცა მესმის, რომ ქართველობა არაქართველის განდევნას ნიშნავს. ჩემი ყველაზე წმინდა გრძნობებია ქართველობაც და ქრისტიანობაც. ნებისმიერი ადამიანი, რომელიც გამოდის და ამბობს, რომ ქრისტეს სახელით ამას თავში უნდა ჩავარტყათ და იმას ყური უნდა მოვაჭრათ და იმას უნდა ვაგინოთ, ეს ჩემთვის ყველაზე წმინდას შეურაცხყოფაა, მაგრამ არასდროს არ მითქვამს, რომ ამის გამო ვინმე უნდა იქნას დასჯილი. სხვათა შორის საზოგადოებამაც და სასულიერო პირებმაც ძალიან ადეკვატურად გამოხატეს თავისი პოზიცია ამ საკითხებთან მიმართებაში", - განაცხადა პრეზიდენტმა.

შეგახსნებთ, გიორგი გაბუნიამ იესო ქრისტეზე „რუსთავი 2-ის“ ეთერში ისაუბრა. "მე ვფიქრობ, რომ იესო ქრისტემ საშინელი შეცდომა დაუშა, როდესაც 2000 წლის წინ ისრაელში მოვიდა. უნდა მოსულიყო აჭარაში და ჯვარზე კი ვეღარ გააკრავდნენ, იმიტომ რომ ხე აღარ იქნებოდა დარჩენილი და ამ დროისთვის ბიძინას ეზოში იქნებოდა გადატანილი ყველა ხე", - განაცხადა გაბუნიამ.  

აღნიშნულის გამო, 19 მარტს, ტელეკომპანია „რუსთავი 2“-ის შენობასთან საზოგადოებრივი მოძრაობა „ქართული მარშის“ აქტივისტები შეიკრიბნენ და ჟურნალისტ გიორგი გაბუნიას გამონათქვამთან დაკავშირებით პროტესტს გამოხატავდნენ. ჟურნალისტებსა და აქტივისტებს შორის დაპირისპირება მოხდა, რა დროსაც ერთ-ერთი ჟურნალისტი დაშავდა.  შინაგან საქმეთა სამინისტრომ მომხდარ ფაქტზე გამოძიება  სსკ-ს 126-ე მუხლით დაიწყო, რაც ძალადობას გულისხმობს. ინციდენტის დროს დაზიანდა ტელეკომპანიის ერთ-ერთი თანამშრომლის კუთვნილი ავტომანქანა, რაზეც გამოძიება სხვისი ნივთის ან ქონების დაზიანების ფაქტზე, სსკ-ს 187-ე მუხლით დაიწყო.

ავტორი: ,

სოციალური ქსელები

„თეგეტამ“ რუსთავის ჭალის ტყის აღდგენისთვის გამწვანების აქცია გამართა

საპატრიარქომ იობის განათლება აღიარა და მას შესაბამისი ხარისხი მიანიჭა

აპრილში „ექსპრესნიუსი“ 1.7 მილიონჯერ წაიკითხეს, სოციალურ ქსელებში, ახალ ამბებს 11 მილიონი ადამიანი გაეცნო

რუსეთის ტერიტორიის მეოთხედი და მოსახლეობის 70% უკრაინული დრონების მოქმედების რადიუსში იმყოფება