2018-01-25 18:19:44, 3467 ნახვა
საზოგადოება
„ყველა ერთისთვის“ - პარლამენტთან „ბახალას“ მხარდამჭერი აქცია მიმდინარეობს
თბილისში, პარლამენტის შენობასთან აქცია - „ყველა ერთისთვის“ მიმდინარეობს.
აქცია მსახიობ გიორგი გიორგანაშვილის (ბახალას) მხარდამჭერებისა და მეგობრების ინიციატივით იმართება და მასში სხვადასხვა არასამთავრობო ორგანიზაციების წარმომადგენლები, საზოგადოებისთვის ცნობილი სახეები და რიგითი მოქალაქეები იღებენ მონაწილეობას.
აქციის მონაწილეები ქვეყანაში არსებულ ნარკოპოლიტიკას აპროტესტებენ და „ბახალას“ გათავისუფლებას ითხოვენ, რომელსაც სასამართლომ 8 წლით თავისუფლების აღკვეთა მიუსაჯა.
გარდა ამისა, აქციის ორგანიზატორების მოთხოვნაა, კანონის სრული სიმკაცრით დაისაჯონ გიორგანაშვილის საქმეში მონაწილე პოლიციელები და უმოკლეს ვადებში შეიცვალოს რეპრესიული ნარკოპოლიტიკა. ისინი ასევე საქართველოს პრეზიდენტს მოუწოდებენ, გამოიჩინოს კეთილი ნება, გამოიყენოს საკუთარი უფლება-მოსილება და გიორგი გიორგანაშვილი შეიწყალოს.
აქციაზე 100-ზე მეტი ადამიანია შეკრებილი. ადგილზე მობილიზებულია საპატრულო პოლიცია.
![]()
ავტორი: ,
epn.ge (@expressnews.ge)
