ე.წ. ციანიდის საქმეზე თბილისის საქალაქო სასამართლოში პროცესი ბრალდების მხარის მოწმეების დაკითხვით განახლდა.

როგორც ცნობილია, დღევანდელ სასამართლო სხდომაზე პროკურატურის 20-მდე მოწმე დაიკითხება.

კერძოდ, პროკურორ ზვიად გუბელაძის ინფორმაციით, დაიკითხებიან ოქრომჭედლები და ასევე გამომძიებლები, რომლებმაც აღნიშნულ საქმეზე სხვადასხვა საგამოძიებო პროცედურები ჩაატარეს.

პროკურორის განცხადებით, ოქრომჭედლები საკუთარ ჩვენებაში დღეს დაადასტურებენ, რომ ნატრიუმის ციანიდი ოქრომჭედლობაში არ გამოიყენება.

რაც შეეხება დაცვის მხარეს, ადვოკატ მიხეილ რამიშვილის განცხადებით, სავარაუდოდ, დღეს  საპატრიარქოს ოქრომჭედლები დაიკითხებიან, რომლებიც ბრალდების პოზიციას გაამყარებენ. მისივე თქმით, თუ არიან ისეთი ოქრომჭედლები, რომლებიც ციანიდს არ იყენებენ, ეს არ ნიშნავს, რომ ციანიდი ოქრომჭედლობაში ზოგადად არ გამოიყენება.

„ციანიდი გამოიყენება ოქრომჭედლობაში - ოქროსთან, ვერცხლთან და სპილენძთან. ეს დამოკიდებულია იმ ოქრომჭედელზე, ვინ როგორი ხარისხის და რისთვის იყენებს მას. ექსპერტებმა თქვეს და თუ კარგად გამოიკვლევენ რაში გამოიყენება ნატრიუმის და კალიუმის ციანიდი, კონკრეტულადაა მითითებული, რომ გამოიყენება ოქრომჭედლობაში. ძალიან აბსურდულია, რომ თითქოს არ გამოიყენება. თუ არიან ისეთი ოქრომჭედლები, რომლებიც არ გამოიყენებენ, შემიძლია გითხრათ, რომ მათ ნამუშევრებს არ უნდა ენდოთ, ჩათვალეთ, ნახევარზე მეტი ოქრო არ იქნება და იქნება სპილენძი“, - განაცხადა მიხეილ რამიშვილმა.

შეგახსენებთ, გამოძიების ინფორმაციით, ბრალდებული მამა გიორგი მამალაძე პატრიარქის მდივან-რეფერენტის შორენა თეთრუაშვილის განზრახ მკვლელობას ამზადებდა ანგარებით, თანამდებობრივი მდგომარეობის და მატერიალური სარგებლის შენარჩუნების მოტივით.

მათივე ცნობით, მიღებული ქიმიური, ტოქსიკოლოგიური და სამედიცინო ექსპერტიზის დასკვნებით დადგინდა, რომ ბრალდებულის ბარგიდან ამოღებული ნივთიერება წარმოადგენს სწრაფი მოქმედების ძლიერ შხამს - ნატრიუმის ციანიდს, რომლის ოდენობა საკმარისი იყო რამდენიმე ადამიანის სიცოცხლის მოსასპობად.

აქედან გამომდინარე, საქმე სასამართლოში წარიმართა სსკ-ის 18, 109-ე მუხლის მე-3 ნაწილის „გ“ ქვეპუნქტით (განზრახ მკვლელობის მომზადება ანგარებით), რაც  სასჯელის სახედ და ზომად 16-დან 20 წლამდე  თავისუფლების აღკვეთას ითვალისწინებს.

გარდა აღნიშნულისა, გიორგი მამალაძეს ბრალი წარდგენილი აქვს ცეცხლსასროლი იარაღის მართლსაწინააღმდეგო შეძენა-შენახვისთვის, საქართველოს სსკ-ის  236-ე მუხლის მე-2 ნაწილით.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

განათლების სამინისტრო - ინფორმაცია სკოლის ტერიტორიების გასხვისებასთან დაკავშირებით, არის სრული სიცრუე

ეროვნული ბანკი სესხების გაცემის წესი გამკაცრებას „მაღალი ეკონომიკური ზრდითა და შედეგად გაზრდილი ხელფასებით“ ხსნის

სესხების გაცემის წესი მკაცრდება

El Mundo: რუსეთის სადაზვერვო სამსახურები შეერთებულ შტატებში ოპოზიციის წარმომადგენლების, კასპაროვისა და პონომარევის მკვლელობას გეგმავდნენ